Gjykata Themelore në Gjilan ka aprovuar kërkesën e Prokurorisë Themelore të Gjilanit, për caktimin e masës së paraburgimit në kohëzgjatje prej një muaji ndaj të dyshuarës A. S., për të cilën Prokuroria pretendon se të premten ajo mbyti foshnjën e porsalindur.
“E pandehura A. S., shtetase e Republikës së Kosovës nga Komuna e Gjilanit, dyshohet se me datë 27.10.2017, ka privuar nga jeta foshnjën e saj gjatë lindjes apo pas lindjes, gjithashtu është munduar të fshehë kryerjen e kësaj vepre”, thuhet në njoftimin e Gjykatës.
Sipas Gjykatës, me këto veprime e pandehura dyshohet se ka kryer veprën penale “Vrasja e foshnjave gjatë lindjes, nga neni 182 të Kodit Penal të Republikës së Kosovës (KPRK)”.
Gruaja nga Gjilani është arrestuar të premten nën dyshimin se e njëjta ka mbytur foshnjën e porsalindur. Siç ka njoftuar Policia, gruaja ka lindur foshnjën e gjinisë mashkull dhe pas lindjes, dyshohet se të njëjtin e ka futur në një qese dhe për pasojë foshnja ka mbetur pa shenja jete.
