Gjatë ditës së sotme po mbahen zgjedhjet për Kuvendin e Odës së Mjekëve të Kosovës.
Dr. Shaban Osmanaj nga Komisioni Qendror i Zgjedhjeve të OMK-së, ka deklaruar procesi i votimit është duke u zhvilluar në të gjitha Qendrat Kryesore të Mjekësisë Familjare dhe Spitalet e Klinikat e SHSKUK-së, shkruan Gazeta Shneta.
Megjithatë, ai ka bërë të ditur se kanë hasur në telashe në Klinikën e Kirurgjisë Vaskulare në QKUK.
“Në Klinikën Vaskulare është bllokuar procesi për shkak të një kandidati i cili nuk është certifikuar nga KQZ. I njëjti nuk është certifikuar pasi ka nënshkruar ose ka dhënë pëlqimin për kandidimin e një personi tjetër, çka me statut është e ndaluar”, ka deklaruar Osmanaj.
Ai ka shtuar se disa vërejtje ka pasur edhe në Klinikën e Veshëve, për çka është duke u diskutuar për të eliminuar paqartësitë.
“Po verifikohet gjithçka dhe së shpejtim presim të rifillojë procesi edhe në këto dy vendvotime”, ka shtuar Osmanaj.
Ai ka thënë se në bazë të të dhënave vetëm në klinikat e QKUK-së, deri më tani kanë votuar rreth 80 për qind e mjekëve.
Procesi mbetet i hapur deri në ora 15:00, ndërsa rezultatet pritet të dalin sot ose më së largu të dielën.
Këto janë zgjedhjet e para të organizuara nga Oda e Mjekëve, me përkrahjen e Ministrisë së Shëndetësisë dhe organizatës “Lux Development”.
KQZ-ja e OMK-së ka ftuar edhe Shoqatën për të Drejtat e Pacientëve dhe Federatën Sindikale për të monitoruar procesin. Poashtu secili kandidat ka të drejtë të ketë një vëzhgues. /Gazeta Shneta/