Një seancë e vetme prej 30 minutash ushtrime mund të ndihmojë në uljen e nivelit të sheqerit në gjak dhe përmirësimin e ndjeshmërisë ndaj insulinës, sipas një studimi të fundit nga Università Cattolica del Sacro Cuore në Itali.
Ky zbulim tregon përfitime të mundshme në parandalimin dhe menaxhimin e diabetit të tipit 2, shkruan Medical News, transmeton Gazeta Shneta.
Aktualisht, rreth 537 milionë të rritur në të gjithë botën jetojnë me diabet, dhe 98% e këtyre rasteve janë të tipit 2. Ky lloj diabeti karakterizohet nga ndjeshmëria e ulët ndaj insulinës, që mund të çojë në rezistencë ndaj saj dhe rritje të nivelit të sheqerit në gjak.
Studimet e mëparshme kanë treguar se ushtrimet fizike, menaxhimi i peshës dhe një dietë e shëndetshme mund të përmirësojnë natyrshëm ndjeshmërinë ndaj insulinës.
Këto gjetje të reja sugjerojnë se një aktivitet fizik i lehtë dhe i shkurtër mund të ketë ndikim pozitiv në shëndetin metabolik dhe të ndihmojë në luftën kundër diabetit të tipit 2.
Studimi është publikuar në Journal of Endocrinological Investigation.