Shkencëtarët në Mbretërinë e Bashkuar kanë zhvilluar një mjet të ri që tregon nëse zemra juaj po plaket më shpejt se trupi juaj, duke ndihmuar mjekët të parashikojnë rrezikun për sëmundje të zemrës.
Studiues nga Universiteti i East Anglia (UEA) analizuan të dhëna nga skanimet MRI të 557 personave në Britani, Spanjë dhe Singapor, përfshirë 336 individë me mbipeshë, tension të lartë apo diabet. Ata matën madhësinë e dhomave të zemrës dhe sa mirë pompimi i saj funksionon – të dhëna që përdoren zakonisht për të parashikuar problemet kardiovaskulare.
Bazuar në këto të dhëna, studiuesit krijuan një formulë që llogarit “moshën funksionale” të zemrës.
Sipas studimit të publikuar në revistën European Heart Journal, zemrat e personave me faktorë rreziku ishin mesatarisht 4.6 vjet më të vjetra sesa mosha e tyre reale. Personat me obezitet kishin edhe plakje më të përshpejtuar të zemrës.
“Mosha funksionale e zemrës te personat me sëmundje si diabeti apo obeziteti mund të jetë dhjetëra vite më e lartë se mosha e tyre biologjike,” tha Dr. Pankaj Garg, kardiolog dhe drejtues i studimit.
Mjeti ka disa kufizime. Ai nuk merr parasysh sa kohë kanë pasur pacientët këto probleme shëndetësore dhe përfshin vetëm persona që kanë mbijetuar me këto sëmundje deri në moshë të thyer – një fenomen i njohur si “survivor bias”. Gjithashtu, grupi i studimit ishte relativisht i vogël, ndaj nevojiten teste të mëtejshme në një popullatë më të gjerë.
Megjithatë, studiuesit shpresojnë që ky mjet të përdoret në të ardhmen për të ndihmuar mjekët të këshillojnë pacientët në lidhje me shëndetin e zemrës dhe të ndihmojë në diagnostikimin më të hershëm të sëmundjeve kardiovaskulare.