Një model i ri i inteligjencës artificiale (AI) mund të identifikojë rrezikun për zhvillimin e më shumë se 100 gjendjeve shëndetësore, bazuar vetëm në të dhënat e një nate gjumi, sipas një studimi të ri nga Universiteti Stanford në SHBA.
Modeli, i quajtur “SleepFM”, është zhvilluar nga studiuesit e Stanford-it dhe funksionon si një model i madh gjuhësor (LLM), i cili “mëson gjuhën e gjumit”. Ky model analizon aktivitetin e trurit, rrahjet e zemrës, frymëmarrjen, lëvizjet e këmbëve dhe të syve gjatë gjumit për të vlerësuar rrezikun e sëmundjeve, raporton Euronews Health transmeton Gazeta Shneta.
Studimi i publikuar në revistën shkencore “Nature”, u bazua në mbi 580,000 orë të dhëna gjumi, të mbledhura nga rreth 65,000 pacientë ndërmjet viteve 1999 dhe 2024. Të dhënat u morën nga klinika e njësive për çrregullimet e gjumit dhe u ndanë në segmente prej pesë sekondash, të cilat shërbyen si “fjalë” për trajnimin e modelit.
Sipas studiuesve, “SleepFM”, arriti saktësi prej të paktën 80% në parashikimin e sëmundjeve si Parkinsoni, Alzheimeri, demenca, sëmundjet hipertensive të zemrës, infarkti, kanceri i prostatës dhe ai i gjirit.
Modeli parashikoi gjithashtu vdekshmërinë me një saktësi prej 84%. Për sëmundje si sëmundja kronike e veshkave, goditja në tru dhe aritmia, saktësia ishte rreth 78%.
Studiuesit theksojnë se kombinimi i shumë sinjaleve fiziologjike e bën modelin veçanërisht të fuqishëm, sidomos kur sinjalet nuk përputhen mes tyre. Në të ardhmen, ekipi planifikon të integrojë edhe të dhëna nga pajisjet të mveshura./Gazeta Shneta/