Aknet janë një gjendje e zakonshme e lëkurës që zakonisht shfaqet gjatë adoleshencës, por mund të përkeqësohet ose të shfaqet edhe gjatë shtatzënisë. Ato zhvillohen kur folikulat e qimeve dhe gjëndrat e yndyrës në lëkurë bllokohen dhe inflamohen.
Gjatë shtatzënisë, aknet mund të shfaqen në formën e pikave të bardha, pikave të zeza dhe puçrrave të inflamuara me qelb, si papula dhe pustula. Mes tjerash, zakonisht shfaqen në fytyrë, qafë, shpinë ose kraharor, zona ku gjëndrat e yndyrës janë më aktive, shkruan burimi Pregnancybirthbaby.org.au transmeton Gazeta Shneta.
Aknet shpesh përkeqësohen në tremujorin e parë, ndërsa në tremujorin e tretë zakonisht përmirësohen ose mund të zhduken. Pas lindjes, ushqyerja me gji mund të ndihmojë në mbajtjen e akneve nën kontroll.
Shkaku kryesor i akneve gjatë shtatzënisë janë ndryshimet hormonale. Hormonet rrisin prodhimin e sebumit, një substancë yndyrore që mund të bllokojë poret dhe të çojë në formimin e akneve. Faktorë të tjerë përfshijnë bakteret, trashëgiminë gjenetike dhe stresin.
Diagnoza vendoset zakonisht nga mjeku përmes ekzaminimit të lëkurës. Trajtimi varet nga ashpërsia e akneve.
Për forma të lehta përdoren produkte lokale si kremra me benzoil peroksidi ose antibiotikë lokalë. Në raste më të rënda, mund të përshkruhen antibiotikë të sigurt për shtatzëninë, si eritromicina.
Disa barna, si retinoidet dhe spironolaktoni, duhet të shmangen pasi mund të dëmtojnë foshnjën.
Aknet nuk ndikojnë në shtatzëni apo te bebi, por është e rëndësishme të përdoren vetëm trajtime të sigurta dhe të ndiqen këshillat e mjekut për kujdesin e lëkurës. /Gazeta Shneta/