Shëndeti i trurit luan një rol kyç në një jetë të gjatë dhe të shëndetshme. Për këtë arsye, zbulimi i hershëm dhe në disa raste parandalimi i problemeve si demenca, plakja e trurit dhe kanceri i trurit është jashtëzakonisht i rëndësishëm.
Studiuesit në Mass General Brigham kanë zhvilluar një model të ri të inteligjencës artificiale (IA), i trajnuar me të dhëna nga rezonanca magnetike (MRI) e trurit, për të ndihmuar mjekët të parashikojnë dhe zbulojnë më herët këto probleme shëndetësore, shkruan burimi Medical News Today transmeton Gazeta Shneta.
Modeli i ri, i trajnuar me pothuajse 49,000 skanime MRI të trurit, është krijuar për të analizuar sasi shumë të mëdha të dhënash njëkohësisht.
Sipas studiuesve, kjo qasje u jep mjekëve një aftësi më të madhe për të identifikuar, parashikuar dhe trajtuar sëmundjet e trurit në faza më të hershme. Studimi mbi këtë mjet inovativ u publikua në revistën shkencore “Nature Neuroscience”.
Mjeti i IA-së quhet “Brain Imaging Adaptive Core (BrainIAC)”. Ai është një model bazë që mëson strukturën e trurit nga dhjetëra mijëra imazhe MRI dhe më pas mund të përshtatet për të identifikuar sëmundje të ndryshme të trurit, për të vlerësuar ashpërsinë e tyre dhe për të parashikuar rreziqet e ardhshme.
Sipas rezultateve të studimit, BrainIAC është në gjendje të përcaktojë moshën biologjike të trurit, të parashikojë rrezikun e demencës, të zbulojë mutacione specifike të tumoreve të trurit dhe madje të parashikojë mbijetesën te pacientët me kancer të trurit.
Këto informacione mund të ndihmojnë mjekët të ndërhyjnë më herët me masa parandaluese, si aktiviteti fizik dhe trajnimi njohës, ose të zgjedhin terapi të synuara për pacientët me tumore specifike, duke përmirësuar cilësinë e jetës dhe mbijetesën. /Gazeta Shneta/