Prokuroria Speciale e Republikës së Kosovës, së fundmi ka ngritur një aktakuzë kundër katër personave të cilët akuzohen për ‘’blerje, posedim, shpërndarje dhe shitje të narkotikëve të rrezikshëm dhe substancave psikotropike’’.
Katër të pandehurit vepronin si anëtarë të grupit në vazhdimësi që nga 2015 deri në 13 mars të këtij viti, në vendet si Kosovë, Shqipëri, Maqedoni si dhe në Serbi, shkruan Gazeta Shneta.
Të pandehurit M.Q., SH. R., H.Q dhe S.Q, poashtu kanë bërë shpërndarje edhe në vendet e Evropës si në Austri.
Me këto veprime të pandehurit në vazhdimësi kanë kryer veprën penale “blerje, posedim, shpërndarja dhe shitja e paautorizuar e narkotikëve të rrezikshëm dhe substancave psikotropike” nga neni 273 paragrafi 2 lidhur me paragrafin 3 të KPK-së, lidhur me nenin 28 dhe lidhur me nenin 281 paragrafi 1 nënparagrafi 1.1 dhe 1.9 të KPRK-së.
Derisa, i pandehuri H.Q., ka pasur në pronësi pa autorizim dhe pa leje nga organet kompetente armën e tipit pushkë “MOSBERG” me kapacitet mbushës prej 4 fishek, si dhe 33 fishek, me çka ka kryer veprën penale “mbajtja në pronësi, kontroll ose posedim të paautorizuar të armëve” nga neni 374 paragrafi 1 të KPK-së. /Gazeta Shneta/