Ambasadori i Kosovës në Emiratet e Bashkuara Arabe, Xhabir Hamiti, ka bërë të ditur se shteti i Abu Dhabit do të financojë ndërtimin e Spitalit të Ri Gjinekologjik në Prishtinë.
Sipas njoftimit, projekti do të realizohet përmes një donacioni prej 25 milionë euro, i ndarë nga Emiratet e Bashkuara Arabe, në bashkëpunim me Ministrinë e Shëndetësisë së Kosovës.
Aktualisht kanë nisur përgatitjet fillestare për përzgjedhjen e lokacionit për ndërtimin e spitalit, shkruan Gazeta Shneta.
Lajmi është bërë i ditur pas një takimi në Abu Dhabi, ku ambasadori Hamiti, i shoqëruar nga këshilltari Melhin Mahmuti, është pritur nga Zëvendëssekretarja e Departamentit të Shëndetësisë – Abu Dhabi, Dr. Noura Al-Gaithi.
Gjatë takimit është bërë e ditur po ashtu se gjatë këtij viti do të nisë edhe procesi i rinovimit dhe pajisjes me teknologji të re mjekësore të Spitalit Sheikh Zayed në Vushtrri, projekt ky në vlerë prej 7.5 milionë euro./Gazeta Shneta/