Përdorimi i tepërt i antibiotikëve mund të rrisë rrezikun e fëmijëve për të zhvilluar astmë dhe alergji, duke prishur bakteret e zorrëve të tyre gjatë një faze kritike të zhvillimit të fëmijës, thotë një studim i ri.
Ekspozimi ndaj antibiotikëve para moshës 2 vjeç shoqërohet me një rrezik më të lartë prej 24% për astmë dhe një rrezik më të lartë prej 33% për alergji ushqimore në fëmijërinë e mëvonshme, raportuan studiuesit.
“Antibiotikët luajnë një rol kritik në luftimin e infeksioneve bakteriale, por mjekët duhet të jenë të kujdesshëm kur u përshkruajnë antibiotikë fëmijëve nën 2 vjeç, pasi përdorimi i shpeshtë mund të ndikojë në rezultatet shëndetësore afatgjata”, tha studiuesi Dr. Daniel Horton.
Për studimin, studiuesit monitoruan shëndetin e më shumë se 1 milion fëmijëve në Mbretërinë e Bashkuar, duke krahasuar trajtimin e hershëm me antibiotikë me rrezikun e tyre të mëvonshëm për alergji dhe astmë.
Hulumtimet e mëparshme kanë sugjeruar që përdorimi i hershëm dhe i përsëritur i antibiotikëve mund të prishë zhvillimin e baktereve të shëndetshme të zorrëve teksa fëmija rritet, thanë studiuesit në shënimet paraprake. Kjo, nga ana tjetër, mund të ndikojë në rrezikun e tyre për gjendje alergjike, shkruan HealthDay, transmeton Gazeta Shneta.
Duke ndjekur fëmijët deri në moshën 12 vjeç, studiuesit zbuluan se ata ishin në rrezik më të lartë për astmë dhe alergji ushqimore nëse ishin ekspozuar ndaj antibiotikëve si foshnje.
Foshnjat që u janë dhënë antibiotikë kishin gjithashtu një rrezik më të lartë prej 6% për alergji sezonale, thanë studiuesit.
“Antibiotikët janë ilaçe të rëndësishme dhe ndonjëherë shpëtimtare, por jo të gjitha infeksionet tek fëmijët e vegjël duhet të trajtohen me antibiotikë”, tha Horton. “Prindërit duhet të vazhdojnë të konsultohen me mjekët e fëmijëve të tyre për mënyrën më të mirë të kujdesit”.
Megjithatë, studiuesit nuk gjetën ndonjë ndikim të qëndrueshëm nga përdorimi i antibiotikëve në rrezikun e sëmundjeve autoimune si sëmundja celiake ose sëmundja inflamatore e zorrëve, ose në gjendjet zhvillimore si ADHD ose autizmi./Gazeta Shneta/