Ministria e Shëndetësisë ka thënë se do të vlerësohet mundësia e përdorimit dhe sigurimit të barnave të reja për trajtimin e Covid-19.
Kompania amerikane e barnave “Merck and Ridgeback Biotherapeutics”, ka zhvilluar një ilaç antiviral për parandalimin e Covid-19 të cilin e ka quajtur ‘Molnupiravir’, shkruan Gazeta Shneta.
Kjo kompani tanimë ka aplikuar në Agjencinë e Barnave – FDA, ku ka kërkuar miratim emergjent të përdorimit të gjerë. Bazuar në një analizë të përkohshme të të dhënave nga 775 pacientë me COVID-19 të butë deri në të moderuar, kompania Merck tha se bari uli rrezikun e shtrimit në spital dhe vdekjes me rreth 50%.
Shumë shtete në botë kanë filluar të rezervojnë sasi të këtij bari për t’u siguruar se do ta kenë në dispozicion nëse i njëjti do të miratohet për përdorim nga FDA dhe Agjencia Evropiane e Barnave – EMA.
Në Kosovë, Ministria e Shëndetësisë ka deklaruar se do të vlerësohet përdorimi dhe sigurimi i barnave të reja për trajtimin e Covid-19, kur është pyetur nëse janë interesuar për Molnupiravir.
“Në bashkëpunim me profesionistët shëndetësor dhe organizatat partnere qëndron e përkushtuar në vlerësimin e përdorimit dhe kështu të sigurimit të barnave të reja të rekomanduara për trajtim kundër Covid-19”, thuhet në përgjigjen e MSH-së.
Kjo ministri tutje ka deklaruar se është në proces të sigurimit të të gjitha barnave që dalin nga udhërrëfyesi klinik për trajtimin e Covid-19 të miratuar nga ministri i Shëndetësisë.
“Ministria e Shëndetësisë mbetet e angazhuar në sigurimin e barnave që dalin nga udhërrëfyesi klinik për menaxhimin dhe trajtimin e Covid-19, ku tashmë ka siguruar Remdesevir dhe është në pritje të kontraktimit të disa barnave të tjera të listës së këtij udhërrëfyesi”, kanë deklaruar nga MSH. /Gazeta Shneta/