Vonesa e anesteziologes në Klinikën e Kirurgjisë Abdominale ka bërë që të anulohet programi operativ për ditën e sotme.
Një burim brenda sallës operative të kësaj klinike ka bërë të ditur për Gazetën Shneta se pacienti ishte përgatitur dhe ishte futur në sallë nga stafi i Kirurgjisë, por operacioni nuk është zhvilluar për shkak të mungesës së anesteziologëve.
“Pacientin e kemi fut në sallë dhe kemi prit deri në ora 8:30 por anesteziologët nuk kanë ardhur. Më pas jemi detyru me nxjerr pacientin nga salla dhe me anulu programin”, ka deklaruar ky burim.
Gazeta ka biseduar me shefin e anesteziologëve Dr. Rexhep Gjyliqi, i cili ka deklaruar se ka ndodhur një keqkuptim ndërmjet një anesteziologe të re e cila është pranuar rishtas në punë në QKUK.
“Anesteziologia e re nuk e ka ditur në cilën njësi të kirurgjisë abdominale do të bëhet operacioni dhe në njërën nga repartet ka pyetur por motra kryesore i ka thënë se nuk ka program për sot dhe ajo ka qëndruar në repart. Nuk është vonuar në punë”, ka deklaruar Gjyliqi.
Gazeta ka kontaktuar edhe me drejtorin e Kirurgjisë Abdominale Dr. Ferat Sallahu, por ai nuk ka pranuar të flas për rastin. /Gazeta Shneta/