Drejtori i Shërbimit Spitalor Klinik Universitar të Kosovës, Dr. Basri Sejdiu, ka deklaruar se në QKUK janë mbyllur vrimat dhe mundësitë për t’i referuar pacientët në spitale private.
“Kur kemi filluar 24 orë trajtimin e infarktit nga 1 shkurti i vitit 2018 asnjë pacient nuk është referuar jashtë. E dijmë që ka pas skandale të ndryshme, QKUK ka qenë një qendër tranzite me tre nënshkrime të mjekëve pacientët kanë shkuar jashtë, kanë ndodhur skandale. Por me këtë punë që e kemi bërë i kemi mshel të gjitha vrimat dhe keqpërdorimet”, ka deklaruar Sejdiu.
Ai ka theksuar se është shtuar numri i mjekëve të rinj nga 7 në 14 në kardiologë invazive, ndërsa kardikirugë nga dy janë bërë tetë dhe po ashtu është shtuar numri i infermierëve nëpër klinika për 300 më shumë.
Sejdiu ka thënë në RTK se sa i përket sistemit kardiovaskular pacientët nuk kanë nevojë të shkojnë jashtë vendit.
Kujtojmë se kardiologjia invazive ka qenë burim i keqpëdorimit të pozitës zyrtare të mjekëve duke përfituar para në kurriz të pacientëve duke i referuar për në spitalet private. /Gazeta Shneta/