Pronari i poliklinikës ‘Avicena’, Driton Shuki është arrestuar nga Policia e Kosovës, sipas njoftimit publik të Zyrës për Media.
Ai është arrestuar për dyshimet se ka bërë blerje/pranim të një pajisje të vjedhur nga persona që po dyshohen se kanë marrë tinëzisht pajisjen mjekësore në vlerë 45 mijë euro nga spitalet e Maqedonisë së Veriut.
Kjo është hera e dytë që arrestohet biznesmeni Driton Shuki për dyshime se kryen vepra penale që përfshijnë të dy shtetet: Kosovën e Maqedoninë e Veriut.
Lidhur me arrestimin e djeshëm, njoftimi i Policisë tregon edhe detajet se pse është ndërmarrë ky veprim.
“Arrestohet një person për blerje, pranim ose fshehje e sendeve të përfituara me kryerjen e veprës kriminale…Pas sekuestrimit të pajisjes ( e cila arrin vlerën rreth 45.000 euro) dhe përfundimit të procedurave të nevojshme policore, në koordinim me prokurorin e shtetit, ndaj personit të dyshuar:- D. Sh, mashkull 47 vjeç, blerje, pranim ose fshehje e sendeve të përfituara me kryerjen e veprës kriminale“, thuhet në njoftimin e Policisë.
Pas publikimit të artikullit, ka reaguar edhe biznesmeni Driton Shuki. Shuki tha për Insajderin se ai nuk është arrestuar por vetëm është intervistuar në cilësinë e dëshmitarit.
“Unë nuk jam arrestuar. Policia ka qenë këtu i ka marrë të dhënat dhe në njoftim kanë shkruar që kam qenë i arrestuar. Policia ka bërë gabim lidhur me njoftimin. Kam reaguar tek Baki Kelani lidhur me këtë dhe i kam dërguar një sqarim. Nuk e kemi ditë që pajisja ka qenë e vjedhur. Dikush është duke tentuar të ma prish imazhin“, ka thënë Shuki.
Testet Covid- Arsyeja pse ishte arrestuar Shuki herën e parë
Biznesmeni Driton Shuki, herën e parë ishte arrestuar në vitin 2020 për testet Covid 19. Shuki ishte arrestuar nga Policia e Kosovës në pikën kufitare në Han të Elezit nën dyshimin se ka bartur mostra dhe rezultate të testeve.
Gjatë kontrollit të tij, Policia e Kosovës i pati gjetur një listë me emrat e 50 qytetarëve ku figuronin edhe rezultatet e testeve për COVID-19.
Laboratori “Avicena KS” në lagjen Arbëria (ish-Dragodan) në Prishtinë kishte marrë mostrat e qytetarëve të Kosovës dhe i ka dërguar në Maqedoni, për të kryer testime.
Një numër i madh i qytetarëve rrëfyen se si kishin paguar nga 50 deri në 120 euro për teste, me të cilat nuk janë lejuar të kalojnë kufirin me Maqedoninë e Veriut e as me Malin e Zi.
Këto teste ishin kryer vetëm në Institutin Kombëtar të Shëndetësisë Publike (IKSHPK).
Ministria e Shëndetësisë më pas kishte licensuar 29 institucione private për të kryer teste për COVID-19 por jo edhe poliklinikën “Avicena KS”. / Gazeta Insajderi/