Asociacioni i të Sëmurëve me Diabet në Pejë (ASD Peja) ka njoftuar se këtë vit është shpërblyer sërish me mirënjohje nga Fondacioni Botëror i Diabetit (WDF), për kontributin e vazhdueshëm në “Kampanjën Globale të Ecjes për Diabetin”, aktivitet ky që zhvillohet çdo vit në kuadër të shënimit të Ditës Botërore të Diabetit më 14 nëntor.
ASD Pejë, ka bërë të ditur se edhe këtë vit është nderuar me mirënjohje nga Fondacioni Botëror i Diabetit në shenjë vlerësimi për kontributin e vazhdueshëm në “Kampanjën Globale të Ecjes për Diabetin”.
Fondacioni Botëror i Diabetit organizon këtë fushatë globale për të ngritur ndërgjegjësimin rreth diabetit dhe rëndësisë së stilit të shëndetshëm të jetesës. Në kuadër të kësaj, organizata të shumta të diabetit nga mbarë bota mobilizojnë qytetarë dhe aktivistë për të marrë pjesë në ecje simbolike dhe aktivitete ndërgjegjësuese.
Që nga viti 2004, kjo kampanjë synon të rrisë vetëdijen për diabetin dhe të promovojë aktivitetin fizik – veçanërisht ecjen si një mënyrë të thjeshtë dhe pa kosto për parandalimin ose menaxhimin e diabetit.
Kosova, përmes shoqatës ASD Pejë, është pjesë e kësaj fushate tash e pesë vite rresht, duke kontribuar me organizimin e ecjeve të koordinuara dhe aktiviteteve informative për komunitetin.
Si rezultat i angazhimit dhe pjesëmarrjes së rregullt, WDF ka vlerësuar ASD Pejë, me një mirënjohje për vitin 2025, duke e cilësuar si një kontribuese të rëndësishme të kësaj nisme globale.
ASD Peja ka falënderuar të gjithë qytetarët, vullnetarët dhe aktivistët që janë bërë pjesë e këtij aktiviteti ndër vite, duke theksuar se angazhimi i tyre mbetet kyç për promovimin e një jetese të shëndetshme dhe rritjen e vetëdijes për menaxhimin e diabetit. /Gazeta Shneta/
