Komuniteti shkencor ndërkombëtar ka hedhur poshtë pretendimet se përdorimi i paracetamolit gjatë shtatzënisë lidhet me autizmin. Administrata e ish-presidentit Donald Trump pritej të shpallte një “zbulim” në këtë drejtim, duke shkaktuar reagime të menjëhershme nga ekspertët rreth shëndetit të fëmijëve.
Trump deklaroi gjatë fundjavës: “Mendoj se gjetëm një përgjigje për autizmin”, duke iu referuar përdorimit të paracetamolit nga gratë shtatzëna. Megjithatë, shkencëtarët theksojnë se nuk ka asnjë provë të tillë. “Jam jashtëzakonisht e sigurt se nuk ekziston ndonjë lidhje mes paracetamolit dhe autizmit,” tha Dr. Monique Botha nga Universiteti i Durhamit.
Një studim i gjerë suedez mbi 2.5 milionë fëmijë gjatë 24 viteve nuk gjeti asnjë lidhje mes përdorimit të paracetamolit dhe rrezikut të autizmit, vonesave intelektuale apo çrregullimit të deficitit të vëmendjes (ADHD), shkruan Euronews Health transmeton Gazeta Shneta.
Sipas ekspertëve, autizmi lidhet me kombinimin e faktorëve gjenetikë dhe mjedisorë, si mosha e prindërve, ndotja e ajrit gjatë shtatzënisë apo mungesa e oksigjenit gjatë lindjes.
Grupet e avokimit si “Autism Speaks”, theksojnë se rritja e diagnozave sot lidhet më shumë me vetëdijen, metodat e përmirësuara të kontrollit dhe kriteret diagnostike të zgjeruara.
Mjekët paralajmërojnë se këshillat për të shmangur paracetamolin mund të jenë të rrezikshme, pasi ky ilaç ndihmon në uljen e temperaturës së lartë gjatë shtatzënisë – vetë një faktor rreziku për zhvillimin e çrregullimeve neurologjike. Për më tepër, sipas Botha, deklaratat e tilla rrezikojnë të stigmatizojnë nënat dhe familjet e fëmijëve autikë. /Gazeta Shneta/