Bashkimi Evropian dhe UNICEF kanë dërguar 100 tonë ndihma humanitare në provincën Ituri të Republikës Demokratike të Kongos, për të mbështetur përballimin e shpërthimit të virusit Ebola.
Ndihmat përfshijnë barna esenciale, pajisje mbrojtëse personale, materiale për parandalimin e infeksioneve, trajtime për kolerën dhe malarien, si dhe tenda dhe pajisje të specializuara për emergjenca, shkruan burimi Euronews Health transmeton Gazeta Shneta.
Dërgesa u nis nga qyteti Liège në Belgjikë dhe pritet të ndihmojë rreth 100 mijë persona të prekur nga situata.
Sipas Komisioneres së BE-së për Menaxhimin e Krizave, Hadja Lahbib, ndihma do të jetë jetike edhe për miliona njerëz që varen nga asistenca humanitare, përfshirë mbi një milion persona të zhvendosur që jetojnë në dhjetëra kampe.
Organizata Botërore e Shëndetësisë (OBSh) e ka shpallur shpërthimin e fundit të Ebolasë, si emergjencë shëndetësore me shqetësim ndërkombëtar.
Lahbib paralajmëroi se situata përbën rrezik jo vetëm për Kongon, por edhe për vendet fqinje në rajon.
Aktualisht nuk ekziston as vaksinë dhe as trajtim specifik për këtë lloj virusi. Megjithatë, Bashkimi Evropian ka ndarë 7.4 milionë euro për zhvillimin e vaksinave dhe trajtimeve në bashkëpunim me OBSH-në, me synim përshpejtimin e testeve klinike.
Ekspertët evropianë theksojnë se rreziku i përhapjes së virusit në vendet e BE-së mbetet i ulët, pasi Ebola transmetohet vetëm përmes kontaktit të drejtpërdrejtë me lëngjet trupore të personave të infektuar. /Gazeta Shneta/