Sipas raportit të fundit të Komisionit Evropian “Digital Decade 2025: eHealth Indicator Study”, shumica e vendeve evropiane kanë bërë përparim në aksesin te kartelat elektronike të pacientit (EHR), por nivelet e dijes dixhitale për shëndetin mbeten sfidë në disa vende.
Në 2024, mesatarja e BE-së për qasjen te EHR arriti 83 për qind, me Belgjikën dhe Estoninë që kanë arritur 100 për qind. Danimarka (98%), Lituania (95%), Malta (94%), Polonia (92%) dhe Norvegjia (91%) janë gjithashtu në krye të listës.
Ndërkohë, Irlanda qëndron në fund me vetëm 25 për qind, për shkak se nuk ka ofruar ende qasje online për të gjithë qytetarët, një situatë që pritet të ndryshojë me nisjen e një sistemi të ri kombëtar elektronik.
Raporti thekson gjithashtu rëndësinë e njohurive dixhitale shëndetësore. OECD zbulon se digital literacy mbetet e ulët sidomos te personat mbi 45 vjeç dhe ata me nivel më të ulët arsimor.
Për shembull, në Itali vetëm 9 për qind e të diplomuarve dhe 5 për qind e atyre me arsim të ulët kanë aftësi të mira dixhitale shëndetësore, ndërsa në Çeki shifrat janë respektivisht 53 dhe 41 për qind.
Ekspertët nënvizojnë se qasja e mirë te kartelat elektronike është thelbësore për zgjerimin e shërbimeve dixhitale, përfshirë konsultat online, duke mundësuar trajtim më të shpejtë, të sigurt dhe të koordinuar për pacientët.
Në fjalën e tij, David Novillo Ortiz nga WHO Europe thekson se vendet me sisteme të zhvilluara EHR dhe shkëmbim të dhënash mund të zgjerohen më lehtë në shërbime si telekonsultat./Gazeta Shneta/