Qendra Klinike Universitare e Kosovës ka sqaruar vendosjen e tarifës për përcjellësit e pacientëve mbi moshën 15 vjeç, pas reagimeve në publik lidhur me detyrimin për të paguar 3 euro për natë gjatë qëndrimit në klinikat e institucionit.
Sipas QKUK‑së, pagesa prej 3 euro për natë zbatohet në të gjitha klinikat e QKUK‑së, por jo për të gjithë.
E nga QKUK, për Gazetën Shneta kanë sqaruar se masa zbatohet vetëm për përcjellësit mbi 15 vjeç, ndërsa përjashtohen plotësisht përcjellësit e pacientëve deri në 15 vjeç, si dhe ata që shoqërojnë pacientë me sëmundje malinje, pavarësisht se ku brenda QKUK-së janë të shtruar.
“ Qendra Klinike Universitare e Kosovës është duke vepruar në përputhje me dispozitat e Udhëzimit Administrativ nr. 03/2024, Shtojca 4, numër rendor 5. Sipas këtij udhëzimi, përcjellësit e pacientëve mbi moshën 15 vjeç janë të obliguar të paguajnë një tarifë prej 3 euro për natë gjatë qëndrimit në klinikat e QKUK‑së. Ky obligim zbatohet në të gjitha klinikat, me përjashtim të Klinikës së Onkologjisë dhe klinikave ku trajtohen pacientë me sëmundje malinje, pavarësisht se pacientët mund të jenë të shtruar në klinika të tjera brenda QKUK‑së. Përjashtim nga pagesa bëjnë gjithashtu përcjellësit e pacientëve nën moshën 15 vjeç.” ka thënë nga QKUK.
Tutje kanë shtuar se për pacientët me sëmundje kronike, menaxhmenti i QKUK‑së është duke zhvilluar disktutime të brendshme dhe ndërinstitucionale lidhur me çështjen e bashkëpagesave për këtë kategori.
E përsa i përket qëllimit të vendimit, nga QKUK ka thënë se taksa synon të reduktojë numrin e përcjellësve brenda klinikave dhe të krijojë një ambient më funksional.
“Qëllimi i kësaj mase është reduktimi i numrit të përcjellësve brenda klinikave, me synim përmirësimin e funksionimit normal të shërbimeve shëndetësore, ruajtjen e rendit, si dhe krijimin e një ambienti më të përshtatshëm për pacientët dhe stafin mjekësor.” thonë nga QKUK
Ndërkohë, lidhur me kushtet për përcjellës, QKUK ka përmendur edhe nevojën për hapësira të përshtatshme për të pritur, veçanërisht në rastet e trajtimit post‑operativ apo kur kërkohet kujdes i shtuar:
“Njëkohësisht, QKUK inkurajohet të sigurojë kushte minimale për përcjellësit e pacientëve, përfshirë vende për ulje dhe hapësira të përshtatshme, veçanërisht në klinikat ku pacientët janë në trajtim post‑operativ apo kërkojnë kujdes të veçantë. Theksojmë se bashkëpagesa për përcjellësit nuk zëvendëson në asnjë rrethanë kujdesin infermieror dhe shërbimet profesionale shëndetësore që u ofrohen pacientëve.” është theksuar nga QKUK./Gazeta Shneta/