Certifikatat digjitale të vaksinimit kundër coronavirusit në Kosovë nga sot do të pranohen nga Bashkimi Evropian.
Njoftimin për pranimin e certifikatave të vaksinimit e kanë bërë të ditur nga Ministria e Shëndetësisë.
“Sekretariati i EU digital Certificate i Komisionit Evropian e ka njoftuar Ministrinë e Shëndetësisë se është konfirmuar pranueshmëria –vendimi mbi ekuivalencën e certifikatës digjitale të vaksinës kundër COVID-19, e lëshuar nga Kosova në EU digital certificate, me qëllim lehtësimin e së drejtës së lëvizjes së lirë brenda shteteve të Bashkimit Evropian”, thuhet në njoftimin e ministrisë.
Certifikatat digjitale do të lexohen në pikat hyrëse dhe kontrolluese brenda shteteve të Bashkimit Evropian.
Në Kosovë deri më tani janë dhënë mbi 1,8 milion doza të vaksinave anti-COVID. /Gazeta Shneta/