Depudeti i PDK-së Bekim Haxhiu po pretendon se Bordi Drejtues nuk ka pasur guxim ta shkarkojë drejtorin e SHSKUK-së Valbon Krasniqin.
Sipas tij kjo ka ndodhur për shkak se auditori ka gjetur keqpërdorime të shumta në SHSKUK të cilat janë përgjegjësi e Bordit.
“Keqperdorimet, vjedhjet në blerjen e barnave, paisjet mjekësore e deri në transport të kufomave, prezantohen të argumentuara në raportin e auditimit për SHSKUK-n për vitin 2021. Për këto shkelje sa herë e kam ngritur zërin dhe asgjë nuk ndërmirrej. Përgjegjës për këtë sigurisht janë drejtori menaxhues dhe Bordi i SHSKUK-së”, ka deklaruar Haxhiu.
Haxhiu ka thënë se këto keqpërdorime kanë ndodhur në kohën kur Bordi udhëhiqej nga Agreta Gecaj-Gashi, e sipas tij tani Qeveria e ka shpërblyer me një pozitë tjetër në Bordin e Fondit të Sigurimeve Shëndetësore.
Reagimi i plotë i Haxhiut:
Dje nuk guxuan ta shkarkojnë Dr Valbon Krasniqin, të shohim si do shkoj sot?!
Pas publikimit të raportit të auditimit nga Zyra Kombëtare e Auditimit për SHSKUK, e ku janë gjetur keqpërdorime të shumta, dje në media doli lajmi se do të shkarkohet drejtori i SHSKUK-së Dr.Valbon Krasniqi.
Zyra Kombëtare e Auditimit ka gjetur keqpërdorime edhe më shumë se sa ne dhe mediat i kemi prezantuar në opinionin publik.
Keqperdorimet, vjedhjet në blerjen e barnave, paisjet mjekësore e deri në transport të kufomave, prezantohen të argumentuara në raportin e auditimit për SHSKUK-n për vitin 2021. Për këto shkelje sa herë e kam ngritur zërin dhe asgjë nuk ndërmirrej.
Përgjegjës për këtë sigurisht janë drejtori menaxhues dhe Bordi i SHSKUK-së.
Sipas raportimeve të mediave Bordi i SHSKUK-së dje bëri përpjekje që përgjegjësinë t’ia faturoj vetëm të Dr. Valbon Krasniqit dhe ta shkarkojnë atë, por siç duket Bordit diçka i hasi sharra në gozhdë, pasi dr.Krasniqi ka njohuri dhe të dhëna konkrete të keqpërdorimit dhe keqmenaxhimit nga ana e Bordit të SHSKUK-se dhe përgjegjës për shkeljet po e bën Bordin.
Raporti i Auditimit ka prezantuar keqpërdorime për vitin 2021 për periudhën kohore, kur Bordi i SHSKUK-së udhëhqej nga Dr.Agreta Gashi, e cila përkundër keqpërdorimeve të prezantuar nga Zyra e Auditorit të Përgjithshëm është shpërblyer nga Qeveria Kurti me pozitë në Bordin e Fondit të Sigurimeve Shëndetësore.
E tash shkarkojeni Dr. Valbonin dhe Bordin, nëse guxoni?!
Të bashkangjitur e gjeni Raportin e Auditorit të Përgjithshëm për SHSKUK-n.