Një stetoskop i pajisur me inteligjencë artificiale (AI) ka treguar se mund të identifikojë tre gjendje të zemrës brenda vetëm 15 sekondash, sipas një studimi të zhvilluar në Mbretërinë e Bashkuar.
Pajisja analizon ndryshime të imëta në rrahjet e zemrës dhe rrjedhjen e gjakut, të cilat nuk mund të dallohen nga veshi i njeriut, duke i mundësuar mjekëve që të zbulojnë shpejt problemet e mundshme dhe të ndërhyjnë në kohë me kujdes mjekësor shpëtimtar, shkruan MedicalXpress përcjell Gazeta Shneta.
Në provën klinike, e cila përfshiu mbi 200 ordinanca të mjekëve familjarë dhe mbi 1.5 milion pacientë me simptoma të ngjashme me insuficiencën kardiake, rezultatet treguan se pacientët e ekzaminuar me stetoskopin AI kishin mbi dy herë më shumë gjasa të diagnostikoheshin me insuficiencë kardiake, rreth 3.5 herë më shumë gjasa të diagnostikoheshin me fibrilacion atrial – një çrregullim i ritmit të zemrës që rrit rrezikun e goditjes në tru – dhe gati dy herë më shumë gjasa të diagnostikoheshin me sëmundje të valvulave të zemrës.
Dr. Sonya Babu-Narayan, kardiologe dhe drejtoreshë klinike në Fondacionin Britanik të Zemrës, e quajti këtë zhvillim “një shembull elegant se si stetoskopi i shpikur mbi 200 vite më parë po përshtatet për shekullin XXI”.
Megjithatë, studimi vuri në pah edhe kufizime: rreth dy të tretat e pacientëve të sinjalizuar për insuficiencë kardiake nga pajisja, pas analizave të mëtejshme, rezultuan të mos e kishin këtë gjendje. Kjo sipas ekspertëve mund të shkaktojë ankth të panevojshëm dhe hetime shtesë, prandaj rekomandohet që pajisja të përdoret vetëm për pacientët me dyshime të bazuara për probleme kardiake, e jo për kontrolle rutinë.
Pavarësisht kësaj, mjekët theksojnë rëndësinë e mjeteve të reja për diagnostikim të hershëm, pasi shumë pacientë diagnostikohen me insuficiencë kardiake vetëm pasi paraqiten në spital në gjendje emergjente.
Në Mbretërinë e Bashkuar mbi një milion persona jetojnë me këtë gjendje, ndërsa në botë numri llogaritet të arrijë në rreth 60 milionë.
Stetoskopi me AI është zhvilluar nga kompania amerikane e teknologjisë shëndetësore Eko Health, ndërsa rezultatet e studimit u prezantuan në takimin vjetor të Shoqatës Evropiane të Kardiologjisë në Madrid./Gazeta Shneta/