Burrat kanë më shumë gjasa se gratë të diagnostikohen me kancer vetëm pasi sëmundja është përhapur në nyjet limfatike ose organe të tjera, çka e bën trajtimin më të vështirë dhe rrit rrezikun për vdekje, tregon një studim i ri.
Studimi, i publikuar në revistën shkencore Cancer Epidemiology, Biomarkers & Prevention, analizoi rreth 2.4 milionë raste me kancer të regjistruara në bazën e të dhënave të Institutit Kombëtar të Kancerit (NCI) në SHBA gjatë periudhës 2015-2022.
Sipas studiuesve, burrat diagnostikohen më shpesh me kancer në faza rajonale, kur sëmundja është përhapur në nyjet limfatike pranë tumorit, ose në faza të largëta, kur kanceri ka prekur organe të tjera të trupit.
Autorja kryesore e studimit, Beth Maclin, studiuese në Institutin Kombëtar të Kancerit në Maryland, tha se faza në të cilën zbulohet kanceri është një nga faktorët më të rëndësishëm që përcakton mbijetesën e pacientëve.
“Tashmë e dimë se burrat kanë më shumë gjasa të vdesin nga shumë lloje të kancerit sesa gratë. Gjithashtu dimë se faza e diagnostikimit është një parashikues kyç i mbijetesës,” tha ajo.
Dallime të mëdha për disa lloje të kancerit
Analiza tregoi se burrat kishin më shumë gjasa të diagnostikoheshin në fazë rajonale për 16 lloje të ndryshme kanceri, ndër to:
kanceri i gjuhës (151% më shumë gjasa),
kanceri i gjëndrave të pështymës (93%),
kanceri i gojës dhe fytit (80%),
kanceri i tiroides (74%),
kanceri i stomakut (67%).
Po ashtu, burrat kishin më shumë gjasa të diagnostikoheshin me 17 lloje kanceri në fazë të avancuar, ku sëmundja ishte përhapur në organe të tjera. Ndër to përfshihen:
kanceri i gjuhës (134% më shumë gjasa),
kanceri i tiroides (128%),
kanceri i gjëndrave të pështymës (97%),
kanceri i stomakut (56%),
melanoma (50%).
Vetëm për disa lloje kanceri, si ai i laringut, fshikëzës urinare, anusit dhe mëlçisë, burrat kishin më pak gjasa të diagnostikoheshin në faza të vona krahasuar me gratë.
Pse ndodh kjo?
Sipas studiuesve, një nga arsyet mund të jetë se gratë vizitojnë më shpesh mjekun, duke krijuar më shumë mundësi që shenjat e kancerit të zbulohen herët.
Një faktor tjetër mund të jetë pjesëmarrja më e lartë e grave në programet e depistimit për disa lloje të kancerit, si dhe mënyra se si mjekët interpretojnë simptomat te burrat dhe gratë.
Studiuesit theksojnë se nevojiten kërkime të mëtejshme për të kuptuar plotësisht arsyet e këtyre dallimeve.
Thirrje për kontrolle të rregullta
Autorët e studimit u bëjnë thirrje qytetarëve që të mos neglizhojnë ndryshimet në trup dhe të kërkojnë vlerësim mjekësor sa më herët.
Sipas tyre, kontrollet e rregullta dhe diagnostikimi në fazat e hershme mbeten ndër mënyrat më efektive për të rritur mundësitë e trajtimit të suksesshëm dhe mbijetesës nga kanceri.