Normat e obezitetit në mesin e të rriturve dhe të rinjve në Shtetet e Bashkuara kanë shënuar rritje të dukshme gjatë dy dekadave të fundit, duke rritur shqetësimet për sëmundjet e zemrës, diabetin dhe problemet e tjera shëndetësore.
Një studim i ri ka zbuluar se rreth 40 për qind e të rriturve amerikanë dhe 20 për qind e të rinjve plotësonin kriteret për obezitet në vitin 2023. Hulumtimi analizoi të dhënat e afro 8 mijë e 700 personave të mbledhura përmes një ankete kombëtare shëndetësore në periudhën 1999-2023.
Sipas gjetjeve, tek të rriturit prevalenca e obezitetit u rrit nga rreth 30 për qind në vitin 1999 në 41 për qind në vitin 2023.
Po ashtu, rastet e obezitetit të rëndë, të përcaktuar me indeks të masës trupore (BMI) 40 ose më shumë, u dyfishuan nga 5 për qind në rreth 10 për qind.
Studiuesit vunë re gjithashtu rritje të konsiderueshme të obezitetit abdominal, pra akumulimit të yndyrës rreth barkut, i cili konsiderohet faktor i rëndësishëm rreziku për sëmundjet metabolike dhe kardiovaskulare. Ky lloj obeziteti u rrit nga 48 për qind në 61 për qind te të rriturit gjatë periudhës së analizuar.
Tek fëmijët dhe të rinjtë nën moshën 20-vjeçare, studiuesit raportuan rritje rreth 30 për qind të rasteve me obezitet dhe rritje më të madhe të rasteve me obezitet të rëndë.
Obeziteti nuk lidhet vetëm me peshën trupore, por edhe me rrezikun për zhvillimin e sëmundjeve kronike. Sipas ekspertëve, personat me obezitet kanë rrezik më të lartë për diabet të tipit 2, tension të lartë të gjakut, sëmundje të zemrës, goditje në tru dhe sëmundje kronike të veshkave.
Autorët e studimit theksuan nevojën për masa parandaluese dhe trajtime të përshtatura për personat që kanë obezitet.
Ndërhyrjet mund të përfshijnë ndryshime në stilin e jetesës, trajtime medikamentoze dhe, në raste të caktuara, ndërhyrje kirurgjikale për humbje peshe.