Fëmija juaj mund të preket nga një sindromë e cila nuk është shumë e rrezikshme gjatë vitit të parë të jetës, por që duhet të trajtohet gjithsesi, shkruan Per Nenat dhe transmeton Gazeta Shneta.
Kjo sindromë shkakton tretjen e shpejtë të lëngjeve gjatë natës dhe për pasojë fëmija do të kërkojë të pijë qumësht vazhdimisht
Si ta kuptojmë nëse kemi të bëjmë me këtë sindromë?
Fëmija gjatë kësaj periudhe do të shfaqë probleme me gjumin, pra nuk do të bëjë gjumë të qetë, do të zgjohet të paktën 3 herë gjatë natës dhe do ta ketë të vështirë të flejë sërish edhe pse ka pirë një sasi rreth 350 ml qumësht apo lëng tjetër. Për të diagnostikuar më parë fëmijën në lidhje me këtë sindromë duhet të përjashtoni mundësinë e diabetit (pra të keni kryer analizat), të keni kryer analizat në lidhje me nivelin e bakrit në organizëm, mundësinë e alergjive ushqimore apo astmës në mënyrë që të veproni më pas për ta trajtuar.
Çfarë duhet të bëjmë?
Nuk mund të flasim për një kurë mjekësore por për një seri veprimesh që prindërit duhet të bëjnë për të përmbushur nevojat e fëmijës por edhe për të reduktuar shqetësimet e gjumit që lidhen me këtë sindromë. Është e rëndësishme që ky problem të trajtohet me kujdes dhe ora biologjike e fëmijës të rregullohet dalëngadalë. Gjidhënia mund të kryhet sa herë fëmija ka nevojë por lëngjet e tjera nuk këshillohen prandaj ju duhet të filloni të reduktoni gradualisht sasinë e lëngjeve që fëmija pi gjatë natës me 10 ml në natë derisa ta mësoni të pijë aq sa në të vërtetë duhet dhe më pas, pra pas muajit të 6 ai mund të pijë edhe vetëm ujë. Evitoni lëngjet me sheqer pasi mund të rrisin gliceminë dhe për pasojë të vështirësojnë gjumin.