Anafilaksia është një reaksion alergjik i rrallë, por i rrezikshëm për jetën, që shfaqet papritur dhe përparon shpejt.
Përveç ushqimeve, edhe pickimet e insekteve, barnat dhe lateksi mund të jenë shkaktarë të saj.
Ekspertët theksojnë se trajtimi i menjëhershëm me epinefrinë (adrenalinë) shpëton jetë, prandaj personat në rrezik duhet gjithmonë të mbajnë me vete auto-injektorë, shkruan HealthDay transmeton Gazeta Shneta.
Në disa raste, mund të ndodhë edhe një reagim i dytë (i ashtuquajturi reagim bifazik) deri në 24 orë pas episodit të parë.
Simptomat variojnë nga skuqje, rrufë dhe ënjtje, deri te vështirësi në frymëmarrje, rënie e presionit të gjakut, marramendje, humbje ndjenje apo edhe arrest kardiak.
Pavarësisht nëse reagimet e mëparshme kanë qenë të lehta, rreziku për anafilaksi mbetet gjithmonë i pranishëm.
Ushqimet si kikirikët, arrat, peshku, vezët dhe qumështi, medikamentet si penicilina apo ibuprofeni, lateksi dhe pickimet e insekteve janë ndër shkaktarët më të shpeshtë.
Specialistët këshillojnë shmangien e plotë të tyre dhe kujdes të shtuar në mjedise publike.
Mjekët alergologë theksojnë rëndësinë e një plani emergjent, informimit të familjarëve dhe mësuesve për rrezikun, si dhe mbajtjen e bizhuterive mjekësore identifikuese.
Në rast të një reagimi të dyshuar, përdorimi i epinefrinës është i domosdoshëm edhe nëse nuk jeni të sigurt – dhe nëse nuk ka përmirësim, rekomandohet administrimi i një doze të dytë dhe kërkimi i ndihmës urgjente./Gazeta Shneta/