Një variant i ri i COVID-19, i quajtur NB.1.8.1, po përhapet në SHBA përgjatë ditëve të nxehta të verës. Ky nënvariant i Omicron-it u zbulua në fund të prillit dhe tani është bërë më i përhapuri, sipas të dhënave nga Qendra për Kontrollin dhe Parandalimin e Sëmundjeve (CDC).
Organizata Botërore e Shëndetësisë (OBSH), e ka klasifikuar si “variant nën monitorim” dhe thotë se ai nuk shkakton sëmundje më të rënda se variantet ekzistuese. Varianti është zbuluar në të paktën 22 shtete, shkruan burimi Very Well Health transmeton Gazeta Shneta.
Varianti NB.1.8.1, si dhe XFG që po konkurron me të për dominim, përmbajnë mutacione që ndihmojnë virusin të shmangë imunitetin, por nuk duket se shkaktojnë më shumë shtrime në spital apo vdekje.
Sipas ekspertit Trevor Bedford, nuk ka ende të dhëna që tregojnë se ndonjëri nga këta variante shkakton simptoma më të rënda.
Disa raportime në media e lidhin variantin e ri me dhimbje të forta fyti, të quajtura si “fyt me dhimbje brisku”, por mjekët thonë se kjo simptomë ka qenë e zakonshme që nga fillimi i pandemisë dhe nuk ka prova të reja në literaturën mjekësore.
Studimet tregojnë se vaksinat e përditësuara për vitin 2023–2024 ofrojnë mbrojtje të mirë edhe kundër këtij varianti. Po ashtu, antivirali Paxlovid mbetet efektiv, pasi varianti nuk ka zhvilluar mutacione që ta pengojnë efektin e tij.
Ekspertët këshillojnë testim të hershëm nëse shfaqen simptoma dhe vaksinim për të mbrojtur veten dhe të tjerët, sidomos personat në rrezik të lartë. /Gazeta Shneta/