Studiues nga Universiteti Mjekësor i Lodzit në Poloni kanë hetuar se si dieta ndikon në ashpërsinë e sëmundjes inflamatore të zorrëve (IBD). Kjo sëmundje përfshin sëmundjen e Crohn-it dhe kolitin ulceroz, të cilat shkaktojnë probleme të rënda gastrointestinale.
Sipas burimit Medical News Today, studimi tregoi se pjesëmarrësit me dieta anti-inflamatore kishin më shumë gjasa të ishin në remision ose të përjetonin sëmundje të lehtë. Nga ana tjetër, ata që ndiqnin dieta pro-inflamatore kishin deri në 3 herë më shumë gjasa të kishin forma të moderuara ose të rënda të IBD, transmeton Gazeta Shneta.
IBD prek miliona njerëz në Shtetet e Bashkuara; CDC vlerëson se 2.4 deri në 3.1 milionë persona jetojnë me këtë gjendje. Shkaku i saktë nuk dihet ende, por besohet se gjenetika dhe faktorët mjedisorë luajnë rol. Nuk ka kurë, por trajtimet dhe ndryshimet e stilit të jetesës mund të ndihmojnë në menaxhimin e simptomave.
Në studimin e botuar në revistën “Nutrients”, u analizuan dietat e 90 pacientëve me IBD (46 me Crohn dhe 44 me kolit ulceroz). Rreth 36% ishin në remision, 22% me formë të lehtë, 31% me formë të moderuar dhe 11% me formë të rëndë.
Përmes intervistave ushqimore dhe pyetësorëve mbi zakonet e të ngrënit, studiuesit llogaritën Indeksin Inflamator të Dietës (DII).
Rezultatet treguan se konsumimi i mishrave të kuq dhe ushqimeve të përpunuara lidhej me përkeqësim të simptomave, ndërsa frutat, perimet dhe ushqimet e pasura me acide yndyrore omega-3 lidhen me përmirësim.
Edhe pas marrjes në konsideratë të faktorëve si mosha, duhanpirja dhe trajtimet, lidhja mbeti e fortë: ata me dieta pro-inflamatore kishin tre herë më shumë gjasa të kishin simptoma më të rënda.
Ky studim nënvizon rëndësinë e një diete anti-inflamatore në menaxhimin e IBD dhe ofron shpresë për pacientët që kërkojnë të përmirësojnë cilësinë e jetës përmes ushqyerjes. /Gazeta Shneta/