Prodhuesi më i madh në botë i prezervativëve, Karex, ka paralajmëruar se çmimet mund të rriten ndjeshëm për shkak të ndërprerjeve në zinxhirët e furnizimit të shkaktuara nga lufta në Iran. Kompania me bazë në Malajzi ka bërë të ditur se, nëse situata vazhdon, çmimet mund të rriten nga 20% deri në 30%.
Sipas drejtorit ekzekutiv, Goh Miah Kiat, kostot e transportit janë rritur dhe vonesat në dërgesa kanë ulur rezervat e klientëve, duke shtuar kërkesën për produkte.
Në një intervistë për Reuters, ai theksoi se situata mbetet e brishtë dhe kompania nuk ka zgjidhje tjetër përveçse të transferojë kostot te konsumatorët, transmeton Gazeta Shneta.
Kompania Karex prodhon mbi pesë miliardë prezervativë në vit dhe eksporton në më shumë se 130 vende. Mes tjerash, furnizon marka të njohura globale si Durex dhe Trojan.
Problemet në transport janë përkeqësuar ndjeshëm: disa dërgesa drejt Evropës dhe SHBA-së po zgjasin deri në dy muaj, ndërsa të tjera mbeten të bllokuara në det.
Paralelisht, kostot e lëndëve të para si goma sintetike, nitrili, alumini dhe lubrifikantët janë rritur që nga fillimi i konfliktit në shkurt 2026.
Megjithatë, furnizimi me derivate petrokimike është prekur nga ndërprerjet në transport, veçanërisht në rrugët strategjike si Ngushtica e Hormuzit.
Në të njëjtën kohë, tregu global po përballet me mungesa të mëdha për shkak të ndërprerjes së aktiviteteve të USAID, e cila siguronte rreth 35% të kontraceptivëve në nivel global.
Vendet në Afrikë dhe Lindjen e Mesme kanë raportuar rënie të ndjeshme të furnizimit, përfshirë një ulje prej 55% në shpërndarjen e prezervativëve në Nigeri.
Pavarësisht sfidave, Karex deklaron se ka rezerva për disa muaj dhe po planifikon të rrisë prodhimin për të përmbushur kërkesën në rritje. /Gazeta Shneta/