Dr. Xhevdet Çuni, kandidat për drejtor të Klinikës së Urologjisë, ka dal me një reagim pas publikimit të rezultateve nga SHSKUK.
Në këtë konkurs Çuni mbeti i dyti me 84.4 pikë ndërsa drejtor u zgjodh Bujar Frangu me 90.7 pikë i cili mbante pozitën e ushtruesit të detyrës, shkruan Gazeta Shneta.
Këtë vlerësim Çuni e ka quajtur “vend të çudirave”, meqë sipas tij thirrja akademike dhe shkencore u vlerësua me vetëm 0.2 pikë.
“Kosova jonë e vogël, vend i çudirave të mëdha! Komisioni përzgjedhës i SHSKUK në faqen zyrtare të këtij Institucioni të nivelit terciar të kujdesit shëndetësor në Kosovë ku sipas nenit 16 pika 1 të Statutit të SHSKUK-së, Statutit të QKUK-së dhe Ligjit për Shëndetësi 03/L-120 ku kërkohet kuadro me thirrje akademike dhe shkencore krahas asaj profesionale ka vlerësuar me 0.20 pikë (!) diferencë punën time 25 vjeçare në Klinikën e Urologjisë në QKUK në Prishtinë, angazhimin akademik Profesor në përputhje me Ligjin e Arsimit të Lartë të Republikës të Kosovës, Diplomën time të Magjistraturës (Universiteti i Prishtinës), Diplomën e studimeve të Doktoraturës (Universiteti i Shkencave Mjekësore në Tiranë), të gjitha të vlerësuara me pikë maksimale nga Profesorët e merituar si në Kosovë edhe në Shqipëri si dhe dhjetëra punime në Platformën Scopus e qindra punime në Konferenca Europiane të Urologjisë ku kam prezentuar shtetin e Kosovës”, ka shkruar Çuni në reagimin e tij.
“Athua a ja vlenë më të sakrifikosh akoma në prezentimin e shtetit tënd kudo nëpër botë kur institucionet e tij bëhen mosmirënjohëse e tallen me personalitete që ja duan më të mirën këtij vendi! Shtet rezervë nuk kemi”, ka shkruar urologu.
SHSKUK gjatë ditës së djeshme i ka publikuar edhe rezultatet për drejtorë të tetë klinikave tjera. /Gazeta Shneta/
Publikohen rezultatet: Përzgjidhen nëntë drejtorë të klinikave në QKUK