Në Danimarkë, nxënësit nga 6 deri në 16 vjeç marrin çdo javë një orë të veçantë mësimi të quajtur “Klassens tid” ose “Ora e klasës”, ku fokusi është te bashkëpunimi, si të trajtojnë njëri-tjetrin dhe si të kuptojnë ndjenjat e të tjerëve”.
Ky program, pjesë e rregullt e orarit shkollor, synon të zhvillojë aftësi sociale dhe emocionale që ndihmojnë fëmijët të përballen me konfliktet dhe sfidat e përditshme në shkollë, shkruan TodaysMama, transmeton Gazeta Shneta.
Gjatë kësaj ore, nxënësit flasin hapur për ndjenjat e tyre, marrëdhëniet me shokët, problemet që hasin dhe mënyrat për të zgjidhur konfliktet. Aktivitetet përfshijnë biseda në grup, role-play dhe ushtrime të shprehjes së emocioneve, që i ndihmojnë fëmijët të mësojnë të dëgjojnë të tjerët dhe të kuptojnë perspektivat e tyre.
Kjo qasje ndihmon në krijimin e një ambienti më të sigurt dhe bashkëpunues në shkollë.
Programi nuk është i fokusuar tek rezultatet akademike apo notat, por tek mirëqenia dhe zhvillimi emocional i fëmijëve.
Përmes aktiviteteve të rregullta, nxënësit mësojnë të ndihen të vlerësuar dhe të mbështetur, të kërkojnë falje kur gabojnë dhe të kontribuojnë pozitivisht në komunitetin e klasës.
Ekspertët ndërkombëtarë të arsimit theksojnë se ky program është një shembull i qasjes së Danimarkës, ku aftësitë emocionale dhe sociale konsiderohen po aq të rëndësishme sa mësimi i lëndëve tradicionale.
Studimet tregojnë se fëmijët që mësojnë empatinë dhe bashkëpunimin që në moshë të hershme janë më të suksesshëm në marrëdhëniet personale dhe kanë më pak probleme me sjelljen agresive apo konfliktet sociale.
Përveç përfitimeve sociale, eksperienca e fëmijëve tregon se ora e klasës ndihmon në reduktimin e stresit, përmirësimin e vetëvlerësimit dhe krijimin e një atmosfere pozitive në shkollë, duke kontribuar në zhvillimin e një shoqërie më të mirë dhe më të bashkëpunueshme në të ardhmen. /Gazeta Shneta/