Një organizatë e shqiptarëve në SHBA i ka dhuruar Kosovës 20 defibrilatorë vitin e kaluar, por këto pajisje i ka mbuluar pluhuri diku dhe askush nuk jep përgjegjësi.
Lëre që nuk janë vënë në funksion për të shpëtuar jetët e qytetarëve të Kosovës, por askush madje nuk jep përgjigje se ku gjenden defibrilatorët e dhuruar nga organizata “Give Kosovo” e shqiptarëve në Amerikë, shkruan Gazeta Shneta.
Kjo organizatë e përfaqësuar nga kardiologu i njohur Sulejman Çelaj vitin e kaluar i ka dorëzuar Ministrisë së Shëndetësisë dhe Ministrisë së Mbrojtjes 20 defibrilatorë automatik mobil të njohur si AED. Ky donacion nga shqiptarët e SHBA-së u dhurua krahas edhe një trajnimi që iu bë qindra nxënësve në shkolla për reanimimin kardiopulmonar (CPR).
Përvjetori i dhurimit të këtij donacioni është rikthyer në kujtesë nga përfaqësuesit e organizatës, shoqëruar me pyetjen se ku kanë mbetur këto pajisje.
“Një vit më parë dhe donacioni ende është duke u mbuluar nga pluhuri diku në një çosh në Kosovë”, ka shkruar kardiologu Çelaj.
Gazeta ka kërkuar përgjigje nga Ministria e Shëndetësisë se çfarë ka ndodhur me këto pajisje. MSH në kohën e dhurimit të donacionit udhëhiqej nga ish-ministri Rifat Latifaj, ndërsa tani nga Arben Vitia.
Nga MSH fillimisht e kemi marr një sqarim për një donacion tjetër të dhuruar nga Ambasada e SHBA-së, e pas sqarimit nuk kanë kthyer përgjigje tjetër.
Përgjigje nuk kanë kthyer as nga Ministria e Mbrojtjes e cila udhëhiqet nga ministri Armend Mehaj. /
Gazeta Shneta/