Kosova është kthyer në model suksesi në fushën e vaksinimit kundër HPV-së.
Instituti Kombëtar i Shëndetësisë Publike të Kosovës (IKShPK), ka mirëpritur këtë javë një delegacion prej 18 zyrtarësh nga Republika e Taxhikistanit, të cilët qëndruan në Kosovë për një vizitë studimore katërditore, raporton Gazeta Shneta.
Përderisa, Republika e Taxhikistanit po përgatitet të përfshijë vaksinën kundër HPV (Human Papillomavirus) në Kalendarin Kombëtar të Imunizimit, Kosova iu shërbeu si shembull i një praktike të suksesshme, duke arritur mbulueshmëri prej 85% që në vitin e parë të implementimit, në vitin 2024.
Drejtore ekzekutive e IKShPK-së, Ardita Baraku, në hapje të vizitës, ka theksuar gatishmërinë e profesionistëve të institutit për të ndarë rezultatet dhe sfidat e procesit.
Teksa, në përmbyllje të takimit, ajo falënderoi zyrtarët nga Taxhikistani për zgjedhjen e Kosovës si destinacion pune dhe shprehu besimin se njohuritë e fituara do t’i ndihmojnë në implementimin e suksesshëm të programit në vendin e tyre.
Shefja e Divizionit për Sëmundje Ngjitëse, Pranvera Gunga-Kaçaniku, nënvizoi se suksesi i vaksinimit HPV në Kosovë është arritur falë bashkëpunimit të Ministrisë së Shëndetësisë, IKShPK-së, MASHT-it, punëtorëve shëndetësorë dhe partnerëve strategjikë.
Ndërkohë, Fetije Fetaj, udhëheqëse e Divizionit të Programit të Zgjeruar të Imunizimit, prezantoi detajet teknike të përfshirjes së vaksinës dhe vlerësoi interesimin e lartë të delegacionit, veçanërisht gjatë vizitës në depon qendrore të vaksinave.
Kontribut të veçantë dhe madhor në realizimin e këtij procesi studimor të vizitës dha edhe UNICEF-i. Përfaqësuesja, Dafina Muçaj u shpreh se ndarja e përvojave me delegacionin nga Taxhikistani është dëshmi e rëndësisë së bashkëpunimit të ngushtë me institucionet shëndetësore për mbrojtjen e fëmijëve, duke konfirmuar gatishmërinë e UNICEF-it për ta thelluar këtë partneritet.
Ndërkohë, udhëheqësi i delegacionit, Ziyodullah Idrisov, falënderoi Ministrinë e Shëndetësisë, IKShPK-në dhe UNICEF-in për mikpritjen dhe programin profesional të organizuar.
Ai e vlerësoi vizitën si një mundësi të vyer për të përfituar njohuri të reja jo vetëm në fushën e vaksinimit kundër HPV-së, por edhe në aspekte të tjera të shëndetit publik, si dhe për t’u njohur më shumë me historinë dhe kulturën e Kosovës.
Në përmbyllje të rrugëtimit katërditor, fjala e fundit i takoi medias, ku u theksua roli dominant i epokës digjitale në përcjelljen e shpejtë dhe të saktë të informacionit rreth vaksinimit kundër HPV-së.
Gazetaret e shëndetësisë ndan teknikat që kanë përdorur gjatë raportimit mbi rëndësinë dhe qasjen në informacionet e duhura rreth sigurisë së vaksinës, përfitimeve shëndetësore dhe rolin e saj preventiv kundër kancerit të qafës së mitrës te vajzat, duke trajtuar njëkohësisht edhe çështjen e menaxhimit të infodemisë.
Vizita katërditore përfundoi me sukses, duke krijuar hapësirë për partneritete të reja në shëndetin publik mes institucioneve të të dyja vendeve. /Gazeta Shneta/