Deputetët e Komisionit parlamentar për hetimin e menaxhimit të pandemisë Covid-19, kanë mbajtur sot mbledhjen e parë ku është diskutuar për planin e punës dhe listën e dëshmitarëve.
Në këtë listë është kërkuar të futen edhe ish-ministri i Shëndetësisë Arben Vitia, si dhe ministri aktual Armend Zemaj, shkruan Gazeta Shneta.
Deputeti i PDK-së Bekim Haxhiu ka deklaruar se ka raportime për keqpërdorimin e kontratave dhe për këtë arsye sipas tij duhet të ftohen si dëshmitarët të gjithë bartësit e institucioneve dhe menaxherët e kontratave.
“Lista e dëshmitarëve duhet të plotësohet, më shumë keni futur mjekë sesa përgjegjës të menaxhimit institucional. Personeli shëndetësor nuk është objekt i hetimit sepse ata kanë rrezikuar jetën e tyre, por për bartësit institucional qeveritar ata që ishin dhe këta që janë. Zyrtarët e MSH-së janë të parët që duhet t’i intervistojm, ish-ministrin Vitia dhe zv.tministrat, sekretarin, udhëheqësin e karantinës, menaxherin e prokurimit, e pastaj kalojmë tek MPB. Drejtori i IKSHPK-së, SHSKUK-së, menaxherët e kontratave”, ka deklaruar Haxhiu.
Deputeti i AAK-së Shkumbin Demaliaj ka thënë se në listën e dëshmitarëve duhet të ftohet edhe ministri i ri Armend Zemaj, për shkak të deklaratave të tij në publik se ka mundur të ketë keqpërdorime gjatë pandemisë.
Kryesuesja e Komisionit Mimoza Kusari-Lila ka kërkuar nga deputetët që të mos nxjerrin konstatime për menaxhimin e pandemisë. Ajo ka thënë se arsyeja pse është formuar ky komision është hetimi i menaxhimit dhe prandaj duhet të pritet derisa të merren dëshmitë dhe dokumentacioni i plotë. /Gazeta Shneta/