Deputeti i Lëvizjes Vetëvendosje Mirsad Shkreta ka reaguar sot ndaj një proteste të organizuar nga Federata e Sindikatave të Shëndetësisë në krye me Blerim Sylën.
Shkreta, i cili me profesion është kirurg oral, ka thënë se Blerim Syla si sindikalist që është në vend se të punojë për interesat e punëtorëve shëndetësorë, ai po i instrumentalizon ata në prag të zgjedhjeve, shkruan Gazeta Shneta.
“Blerim Syla i FSSHK, si sindikalist që është në vend se të jetë argat i interesave të punëtorëve shëndetësorë, ai po i instrumetalizon ata përsëri, siç bën zakonisht në prag të zgjedhjeve. Ai nuk po kërkon përgjegjësi te ata të cilëve iu vë në shërbim e që e mashtruan me ligjin për paga, por organizon protestë kundër një qeverie të re pikërisht në javën finale të fushatës për zgjedhjet lokale”, ka shkruar Shkreta në reagimin e tij.
Shkreta i ka përmendur edhe memorandumin që FSSHK e kishte nënshkruar me ish-koalicionin e PAN-it në prag të zgjedhjeve parlamentare në vitin 2017.
“Nëse në herat e kaluara i ka përdorur punëtorët shëndetësorë si mbështetje paraelektorale për një subjekt apo tjetër, tash po provon që t’i përdorë ata kundër kryetarit të ardhshëm të Prishtinës, Dr. Arben Vitia”, ka deklaruar Shkreta.
“Ligji i pagave do të bëhet ashtu siç duhet dhe për këtë po punohet intensivisht. Rritja e pagave është synim që duhet të ndjekë rritjen e produktivitetit brenda rritjes ekonomike, e jo premtim i parealizuar për qëllime elektorale”, ka shkruar në fund deputeti i VV-së.
FSSHK mbajti sot protestë para Qeverisë së Kosovës ku u kërkua procedimi i Ligjit të Pagave. Kryesindikalisti Syla ka thënë se nëse kjo nuk ndodhë deri pas 14 nëntorit, ditës kur do të mbahet balotazhi në zgjedhjet lokale, atëherë veprimet sindikale do të intensifikohen. /Gazeta Shneta/