Ndonëse janë ndërruar dy ministra të shëndetësisë që nga 22 marsi i vitit të kaluar kur qeverisjen e vendit e mori Lëvizja Vetëvendosje në krye me Albin Kurtin as Arben Vitija dhe as tashmë ministri aktual, Rifat Latifaj, nuk kanë arritur të formojnë bordin drejtues të Fondit për Sigurime Shëndetësore.
Fondi për Sigurime Shëndetësore mbetet pa bord drejtues tash e 11 muaj, që nga koha kur nga pozita e kryesuesit të bordit pati dhënë dorëheqje ish ministri i shëndetësisë, Armend Zemja, ish ministrja e financave, Hykmete Bajrami dhe ish ministri i Punës dhe mirëqenies sociale, Skënder Reçica.
Të tre këta ishin përfaqësues të tri ministrive në bordin drejtues të fondit.
Në anën tjetër, shefi i kabinetit të Ministrisë së Shëndetësisë, Kujtim Salihu, në një përgjigje për Gazetën Shneta, ka konfirmuar se së shpejti do të formohet bordi mirëpo ai thotë se ende nuk dihet një datë e saktë se kur do të ndodh një gjë e tillë.
Gazeta poashtu tash e disa ditë ka adresuar pyetje në ministri të shëndetësisë për të marrë datën e saktë se kur pritet të formohet bordi por të njëjtët nuk i janë përgjigjur gazetës.
Këtij bordi i duhet t’i sigurohet një përfaqësues nga Ministria e Shëndetësisë, Ministria e Financave dhe një përfaqësues nga Ministria e Punës dhe Mirëqenies Sociale.
Aktualisht ky bord ka vetëm katër anëtarë, Rrezart Halili përfaqësues i Odës së Profesionistëve Shëndetësorë, Murat Berisha përfaqësuesi i Shërbimit Spitalor Klinik Universitar të Kosovës, Bujar Gashi nga Asociacioni i komunave të Kosovës si dhe Muhamedali Kodra nga shoqata e të drejtave të pacientëve.
Në njërën nga mbledhjet e komisionit për shëndetësi të mbajtur në fund të dhjetorit të vitit paraprak, Ministri i Shëndetësisë, Rifat Latifi, pati thënë se Fondi për Sigurime Shëndetësore dhe Sistemi Informativ Shëndetësorë janë njëri ndër prioritet e tij gjatë mandatit katër vjeçar. /Gazeta Shneta/