Ka dështuar sot pika e rendit të ditës së mbledhjes së Senatit të Universitetit të Prishtinës, ku do të votohej për avancimin e një kandidati në lëndën e kirurgjisë.
Senati i Universitetit të Prishtinës “Hasan Prishtina” ka mbajtur sot mbledhjen e radhës në të cilën ishte paraparë avancimi i një kandidati për lëndën e kirurgjisë në pikën e tretë të rendit të ditës, shkruan Gazeta Shneta.
Gazeta ka marr vesh nga burime se në këtë pikë të rendit të ditës në mbledhjen e Senatit të udhëhequr nga ud.rektorja Luljeta Plakolli-Kasumi, ka qenë e paraparë të votohet për avancimin e kandidatit Halit Maloku.
Megjithatë kjo nuk ka ndodhur për shkak se kjo pikë e rendit të ditës është anuluar në momentin e fundit.
Mbledhja e Senatit ka zgjatur vetëm disa minuta.
Pas kësaj mbledhje ka mbajtur një konferencë për media kandidati Lulzim Vokrri, i cili po pretendon se i është bërë e padrejtë nga Këshilli i Fakultetit të Mjekësisë si dhe nga Komisioni Recenzues. Ky i fundit në raportin e parë e kishte vlerësuar Vokrrin me më shumë pikë sesa kandidati Maloku, por më pas Këshilli i Fakultetit kishte vendosur që ta kthej lëndën e tij në rivlerësim dhe më pas Vokrrit i janë hequr pesë pikë të monografisë, për çka kirurgu vaskular ka thënë se i është bërë e padrejtë dhe se pikët i janë hequr në mënyrë klandestine. /Gazeta Shneta/