21 maji do të bashkojë mjekët shqiptarë që jetojnë dhe veprojnë jashtë kufijve të vendlindjes në një konferencë 1-ditore në Munih.
Nën organizimin e Shoqatës së Mjekëve Shqiptarë në Gjermani, Lidhjes së Mjekëve Shqiptarë në Zvicër dhe kompanisë Yess Pharma, kjo konferencë do të mbledhë mjekët shqiptarë për të ndarë përvojat e tyre me bashkëatdhetarë.
“Konferenca 1-ditore internacionale interdisziplinore” do të zë vend në hotelin ‘NH Munchen Ost Conference Center’, aty ku do të prezantohen punime interesante nga ligjëruesit e përzgjedhur.
Përveç pjesës akademike, kjo ngjarje synon eksperiencën më të mirë sociale për pjesëmarrësit, teksa mbyllja do të jetë me një gala mbrëmje në ritmet e muzikës së këngëtarit nga Struga, Selami Kolonja.
Kjo ngjarje llogaritet të jetë unike dhe e para e këtij lloji, duke bashkuar profile të ndryshme mjekësh për të shpërndarë përvojat me njëri-tjetrin.
Eventi do të jetë poashtu i akredituar nga Dhoma e Mjekut në Berlin dhe pjesëmarrësit do të marrin pikë akredituese.
Regjistrimi i pjesëmarrësve do të jetë i hapur deri më 10 maj, ndërsa regjistrimi mund të bëhet përmes email adresës: [email protected].
Dr. Mentor Bilali nga Lidhja e Mjekëve Shqiptar në Zvicër u ka bërë thirrje kolegëve të tij në diasporë të marrin pjesë në këtë event për ta begatuar atë edhe më shumë.