Problemet me kujtesën apo të menduarit janë të zakonshme me kalimin e moshës, por rënia e moderuar deri në të rëndë njohëse nuk konsiderohet pjesë normale e plakjes. Këto gjendje shpesh lidhen me demencën, megjithëse jo çdo rast i dëmtimit të lehtë njohës (MCI) përfundon në sëmundje.
Sipas burimit Medical News Today, studimet tregojnë se 10–20% e personave me MCI zhvillojnë demencë brenda një viti.
Prandaj, mjekët theksojnë rëndësinë e një stili jetese të shëndetshëm për të mbajtur trurin aktiv me kalimin e moshës. Midis masave të rekomanduara përfshihen ndjekja e dietës MIND (e kombinuar nga dieta mesdhetare dhe ajo për parandalimin e hipertensionit), ushtrimet fizike me intensitet të moderuar ose të lartë, si dhe angazhimi aktiv social, transmeton Gazeta Shneta.
Shkencëtarët nënvizojnë se faktorë të tillë si obeziteti, konsumimi i tepërt i alkoolit, presioni i lartë i gjakut, kolesteroli i lartë, diabeti i tipit 2, depresioni dhe izolimi shoqëror rrisin dukshëm rrezikun për rënie njohëse.
Përkundrazi, ushqyerja e balancuar, aktiviteti mendor dhe marrëdhëniet shoqërore mund të veprojnë si mburojë.
Një studim i publikuar së fundi në “The American Journal of Medicine”, sjell prova të reja se këto ndërhyrje të stilit të jetesës ndikojnë pozitivisht në shëndetin e trurit. Autorët u bëjnë thirrje mjekëve dhe politikëbërësve të mbështesin këto praktika si pjesë të strategjive publike, për të parandaluar rënien njohëse në nivel global.
Në thelb, parandalimi i hershëm përmes ushqyerjes, aktivitetit fizik dhe angazhimit social shihet si çelësi për një tru më të shëndetshëm gjatë plakjes. /Gazeta Shneta/