Shkalla e kancerit kolorektal është në rritje tek fëmijët, adoleshentët dhe të rinjtë gjatë viteve të fundit.
Së fundmi, studiuesit kanë analizuar lloje të ndryshme dietash dhe baktere për të kuptuar nëse mikrobioma e zorrëve dhe dieta ndikojnë në zhvillimin e kancerit kolorektal, shkruan burimi Medical News Today përcjell Gazeta Shneta.
Shkencëtarët kombinuan tri dieta të ndryshme me tre lloje të ndryshme bakteresh për të parë ndikimin e tyre në zorrë.
Dietat me pak karbohidrate, si dieta keto, janë bërë gjithnjë e më të njohura vitet e fundit, por shumë ekspertë shqetësohen për ndikimet negative të mundshme të kufizimeve dietike.
Studiues nga Universiteti i Torontos në Kanada kryen një studim për të hetuar se si dietat me pak karbohidrate ndikojnë në bakteret e lidhura me kancerin kolorektal.
Eksperimentet u zhvilluan me minj, të cilët u ushqyen me dieta të ndryshme: dietë me pak karbohidrate, dietë normale dhe dietë të stilit perëndimor, në kombinim me lloje të ndryshme bakteresh.
Ata u përqendruan në ndikimin e dietave tek disa baktere dhe se si kjo mund të kontribuojë në zhvillimin e kancerit kolorektal.
Rezultatet treguan se një lloj i Escherichia coli ndikohet negativisht nga dietat me pak karbohidrate, duke çuar në rritjen e polipeve, disa prej të cilave mund të zhvillohen në kancer kolorektal.
Studimi u publikua në revistën “Nature Microbiology”. /Gazeta Shneta/