Dilatimi dhe kiretazhi, i njohur si D&C, është një procedurë kirurgjikale që përdoret për të hequr inde nga brendësia e mitrës. Ajo përfshin zgjerimin e qafës së mitrës (dilatimi) dhe më pas pastrimin e indeve me një instrument të quajtur kiretë. Ndonjëherë kjo procedurë kryhet së bashku me histeroskopinë.
D&C përdoret shpesh për të diagnostikuar shkakun e gjakderdhjeve jonormale vaginale, si gjakderdhja midis cikleve, menstruacionet e rënda ose gjakderdhja pas menopauzës. Indi i marrë dërgohet për analiza laboratorike. Gjithashtu, përdoret për të hequr indet pas një aborti spontan ose si pjesë e një aborti kirurgjikal.
Para procedurës, mjeku do të bëjë disa pyetje dhe është e rëndësishme të informoni nëse jeni shtatzënë, keni alergji apo probleme me gjakderdhjen. Mund t’ju kërkohet të mos hani apo pini për disa orë dhe ndonjëherë jepen ilaçe për të zbutur qafën e mitrës.
Procedura kryhet zakonisht nën anestezi të përgjithshme dhe zgjat rreth 5–10 minuta. Pas saj, pacientja qëndron disa orë në rikuperim. Brenda disa ditësh mund të ktheheni në aktivitetet normale, por mund të përjetoni dhimbje të lehta dhe gjakderdhje për 1–2 javë.
Për të shmangur infeksionet, rekomandohet të evitohen tamponët, marrëdhëniet seksuale dhe larjet në ujë për disa ditë. Komplikimet janë të rralla, por mund të përfshijnë infeksion, gjakderdhje ose dëmtim të mitrës. Kontaktoni mjekun nëse shfaqen simptoma shqetësuese.
Ky tekst është marrë nga burimi Pregnancy Birth Baby dhe është përkthyer dhe redaktuar nga Gazeta Shneta.