Personat që kanë vështirësi në njohjen dhe shprehjen e emocioneve të tyre kanë më shumë gjasa që dhimbjet kronike t’ua vështirësojnë jetën e përditshme, sugjeron një studim i ri.
Hulumtimi, i publikuar në Health Psychology, tregon se një gjendje e njohur si alexithymia lidhet me nivele më të larta stresi psikologjik tek personat me dhimbje kronike.
Studimi është realizuar nga studiues në Johns Hopkins University School of Medicine, të cilët kanë ndjekur rreth 1,500 persona me dhimbje kronike në Shtetet e Bashkuara.
Rezultatet tregojnë se personat me nivele më të larta të vështirësisë për të kuptuar emocionet, me kalimin e kohës zhvillojnë më shumë ankth dhe depresion.
Këto probleme psikologjike, sipas studiuesve, ndikojnë drejtpërdrejt në përkeqësimin e përditshëm të dhimbjes dhe në uljen e cilësisë së jetës.
Sipas autores së studimit, Rachel Aaron, rezultatet tregojnë se lidhja funksionon në një drejtim: vështirësia për të përpunuar emocionet rrit problemet me dhimbjen, dhe jo anasjelltas.
Kjo sugjeron se problemet emocionale janë faktor rreziku për përkeqësimin e dhimbjeve kronike.
Ekspertët theksojnë se ndihma për pacientët që të kuptojnë dhe menaxhojnë më mirë emocionet e tyre mund të ndihmojë në uljen e ankthit dhe depresionit, duke lehtësuar edhe përjetimin e dhimbjes.
Sipas studiuesve, përfshirja e këtij aspekti në trajtimet psikologjike mund të përmirësojë ndjeshëm menaxhimin e dhimbjes kronike dhe cilësinë e jetës së pacientëve./Gazeta Shneta/