Inspektorati Shëndetësor brenda inspektimeve të vitit të kaluar, ka hasur në stomatolog duke kryer shërbime specialistike të kirurgjisë orale.
Para disa ditësh është ngritur një diskutim nga Oda e Stomatologëve të Kosovës të cilët kanë shprehur shqetësimin e tyre në lidhje me gjobat dhe masat e Inspektoratit Shëndetësor ndaj institucioneve private të stomatologëve, shkruan Gazeta Shneta.
Këtë shqetësim OSK e ka shprehur edhe në një takim me ministrin e Shëndetësisë Rifat Latifi.
Megjithatë nga Inspektorati Shëndetësor thonë se të gjitha masat dhe gjobat që janë ndërmarr ndaj stomatologëve, janë të bazuara në Ligjin për Shëndetësi si dhe në Udhëzimin Administrativ 09/2014.
Kryeinspektori Shaban Osmanaj ka thënë se vitin e kaluar janë kryer rreth 1 mijë inspektime në të gjitha institucionet shëndetësore, ku në 39 prej tyre janë gjobitur dhe ndaluar veprimtaritë shëndetësore në fushën e stomatologjisë.
Ai ka bërë të ditur edhe natyrën e shkeljeve që kanë rezultuar me gjoba dhe ndalesa.
“Nga 39 denime, në 27 raste kemi hasur institucione private shëndetësor (stomatologjike) pa licencë ose i kishte skaduar licenca pesëvjeçare, kurse në 12 raste institucioni ka qenë i licencuar, por ka pasur veprimtari shtesë që nuk është njoftuar paraprakisht Divizioni për Licencim dhe Akreditim të Institucioneve shëndetësore në kuadër të Ministrisë së Shëndetësisë”, ka deklaruar Osmanaj.
Poashtu kryeinspektori ka thënë se kanë hasur edhe në raste kur doktorët e stomatologjisë kanë kryer edhe shërbime specialistike të kirurgjisë orale.
“Po, kemi pasur edhe raste kur profesionisti shëndetësor ka qenë i licencuar si mjek stomatolog por ka kryer shërbimet e kirurgjisë orale”.
“Në të gjitha rastet masat janë marrë konformë Ligjit Nr 04/L-125 Për Shëndetësi, si dhe akteve nënligjore duke perfshir edhe Udhezimin Administrativ 09/2014”, ka deklaruar Osmanaj. /Gazeta Shneta/