Një vezë përmban rreth 6 gram proteina, por ka shumë alternativa, si bimore ashtu edhe shtazore, që ofrojnë më shumë proteina për 100 gram, madje shpesh edhe një profil më të pasur ushqyes.
Duhet mbajtur mend se nuk ka rëndësi vetëm sasia e proteinës, por edhe cilësia e saj, sa mirë përthithet nga trupi, shija dhe sa lehtë përshtatet në jetën e përditshme.
Ekspertët theksojnë se dieta më e mirë është ajo e larmishme, ndaj ka shumë opsione për të rritur marrjen e proteinave përtej vezëve.
Mishi pa dhjamë, si ai i viçit, është një burim i shkëlqyer proteinash dhe përmban gjithashtu vitamina të grupit B, hekur dhe zink. Edamame ose soja e gjelbër, një alternativë bimore, ofron proteina së bashku me fibra dhe minerale të rëndësishme.
Edhe peshqit si merluci janë një zgjedhje e mirë, ndërsa versionet e kriposura kanë përmbajtje edhe më të lartë proteinash, por duhet konsumuar me kujdes për shkak të kripës.
Farat e kungullit janë një tjetër burim i pasur, ndërsa ushqime si karkalecat, qiqrat dhe tofu ofrojnë proteina të konsiderueshme dhe mund të përgatiten në shumë mënyra të ndryshme. Kikirikët dhe produktet e sojës janë gjithashtu zgjedhje të mira për një dietë të balancuar.
Produktet e bulmetit si kosi grek, mozzarella dhe gjiza përmbajnë proteina të mira dhe lëndë ushqyese si kalciumi dhe probiotikët. Ndërkohë, quinoa është një proteinë e plotë bimore, ndërsa fasulet dhe djathi parmixhano dallohen për përmbajtjen shumë të lartë të proteinave.
Peshku ton dhe mishi i pulës apo gjelit të detit mbeten ndër burimet më të mira, pasi kanë një raport të mirë proteinë-yndyrë dhe përthithen lehtë nga organizmi.
Vezët janë një burim i mirë proteinash, por jo i vetmi. Një dietë e larmishme mbetet mënyra më e mirë për të përfituar nga vlerat ushqyese që ofrojnë ushqime të ndryshme.