Pacientët me kancer janë veçanërisht të ndjeshëm ndaj infeksioneve të rënda me COVID-19, por një studim i ri tregon se dozat përforcuese të vaksinës mund të jenë jetike për mbrojtjen e tyre. Sipas një studimi të botuar në “JAMA Oncology”, këto doza reduktuan shtrimet në spital dhe në kujdesin intensiv me 29%.
Në përgjithësi, një shtrim apo pranimi në terapi intensive u parandalua për çdo 150 deri në 166 pacientë të vaksinuar me dozë përforcuese, raporton Health Day transmeton Gazeta Shneta.
“Reduktimi i hospitalizimeve ishte domethënës dhe numri i pacientëve që duhet të vaksinoheshin për të parë përfitime ishte i ulët,” tha Dr. Jan Figueiredo nga Cedars-Sinai Medical Center në Los Angeles.
Sistemet imunitare të pacientëve me kancer mund të dobësohen nga vetë sëmundja dhe trajtimet që marrin, prandaj organizatat kryesore shëndetësore rekomandojnë vaksinimin e tyre kundër COVID-19.
Në studim u analizuan të dhënat e mbi 161,000 pacientëve me kancer të trajtuar gjatë viteve 2022–2023 në katër qendra shëndetësore në SHBA.
Figueiredo theksoi se niveli i vaksinimit me doza përforcuese në këtë grup mbetet i ulët: deri në janar 2022, vetëm 68% kishin marrë një dozë përforcuese, dhe vetëm 38% kishin marrë doza të reja që synonin variante të ndryshme të virusit.
“Nuk është ende e qartë nëse kjo hezitim vjen nga shqetësimet e pacientëve apo pasiguria e mjekëve për të vaksinuar gjatë trajtimit,” tha ajo. “Por është e qartë se ne duhet të avokojmë fuqishëm për vaksinimin e grupeve të ndjeshme, përfshirë pacientët me kancer.
Ky është studimi më i madh deri më sot që shqyrton efektivitetin e vaksinës te pacientët me kancer. Studimet e ardhshme do të analizojnë efektin e vaksinës edhe në grupe të tjera, si personat me sëmundje autoimune apo të transplantuar. /Gazeta Shneta/