Ministri i Shëndetësisë, Uran Ismaili, është kritikuar ashpër nga Dr. Ekrem Hyseni, Dr. Arben Vitia dhe Dr. Refik Bytyqi.
Në emisionin Debat Plus në TV Dukagjini, Ismaili është vënë në llupën e mjekëve për punën e tij në më pak se dy vjet në rolin e tij si ministër.
Dr. Hyseni ka kritikuar Ismailin për mbulimin e tij medial të skandaleve, dënimin e stafit mjekësor që raporton mungesa të materialeve shëndetësorë dhe neglizhencën dhe mos-përgjegjësinë për instalimin e rezonancës magnetike në QKUK.
“I kemi dy rastet, në Prizren për mungesën e filmave të rëngenit dhe rastin në Gjinekologji”, u shpreh Hyseni, duke shtuar papërgjegjësinë për mos-instalimin dhe mos-funksionalizimin e pajisjeve.
“Për dy projekte, për EKG dhe për rezonancë, kanë përfundu proceset në muajin maj dhe ende nuk janë instalu, nuk janë në funksion”, shtoi tutje Hyseni.