Sipas draftit të propozuar nga Grupi Punues për Ligjin e ri për Pagat, mjekët do të marrin rrogë 965 euro, ndërsa infermieret rreth 460 euro. Ky draft është kundërshtuar nga Oda e Mjekëve dhe Federata e Sindikatave të Shëndetësisë
Projektligji i ri për Pagat është ende duke u mbajtur në dëgjime publike nga Ministria e Administratës Publike. Me këtë projektligj koeficienti 1 i rrogës bazë llogaritet të jetë 239 euro. Drafti i propozuar nga Grupet Punuese ka paraparë që mjekët specialist të kenë koeficientin 4.0, që sipas përllogaritjes me rrogën bazë i bie që paga e tyre të jetë rreth 956 euro.
Ndërkaq mjekët specializant do të kenë koeficientin 3.30 që në para i bie rreth 788 euro pagë në muaj. Mjekët e përgjithshëm do të kategorizohen me koeficientin 3 me pagë mujore 717 euro. Po kaq do ta kenë edhe farmacistët e diplomuar, shkruan Gazeta Shneta.
Infermieret, mamitë dhe teknikët medicinale në kategorinë 1, do të kenë koeficient 2.15. Rroga e tyre do të jetë pak mbi 500 euro. Këto pozita të njëjta në kategorinë 2, koeficienti i tyre do të jetë 1.95 me rrogë 466 euro; Në kategorinë 3, infermieret, mamitë dhe teknikët do të kenë koeficientin 1.90 me pagë 454 euro, kurse në kategorinë 4, koeficienti do të jetë 1.70 me pagë 406 euro.
Drafti i ri ka kategorizuar edhe teknikët e farmacisë me koeficient 1.60 me pagë mujore 382 euro, dhe asistentët e infermierisë me koeficient 1.45 apo rrogë 346 euro.
Kujtojmë se ky draft është kundërshtuar ashpër nga Oda e Mjekëve të Kosovës dhe Federata e Sindikatave të Shëndetësisë. E para ka kërkuar që të respektohet propozimi i tyre ku mjekët specialist barazohen me gjyqtarët. OMK ka deklaruar se nëse një gjë e tillë nuk ndodhë, atëherë do ta bëjnë Qeverinë përgjegjëse për gjendjen e rëndë në shëndetësi. Edhe Federata në anën tjetër e ka quajtur të papranueshëm koeficientin 4.0 për mjekët specialistë. /Gazeta Shneta/