Drejtori i Shërbimit Spitalot dhe Klinik Universitar të Kosovës, Dr. Basri Sejdiu, është nderuar sot me titullin “Ambasador i Paqes” nga Federata e Paqes Universale.
Në konferencën rajonale, me temën “Domosdoshmëria e bashkëpunimit – sfidë dhe nevojë për integrim”, e cila po mbahet në Prishtinë, morën pjesë përfaqësues të Federatës së Paqes për Evropën dhe Lindjen e Mesme, si dhe figura të shquara të jetës politike e shtetërore të Kosovës, Shqipërisë, Luginës së Preshevës dhe Malit të Zi”.
Titulli Ambasador për Paqe u jepet atyre individëve, jeta e të cilëve mishëron parimin e të jetuarit për hir të të tjerëve dhe që i përkushtohen praktikave që promovojnë vlera morale universale, familjen e fortë e të qëndrueshme, bashkëpunimin ndërfetar dhe ndëretnik, harmoninë ndërkombëtare dhe vendosjen e një kulture të paqes.
Duke kapërcyer kufijtë racialë, fetarë, kombëtarë dhe etnikë ambasadorët për paqen kontribuojnë në përmbushjen e shpresës së të gjitha kohërave – një botë e bashkuar në paqe, ku dimensionet fizike dhe shpirtërore të jetës janë në harmoni.