Ka nisur si projekt për të ndal keqpërdorimet, por “Transformimi Farmaceutik” është bërë vet objekt i dyshimeve. Madje këto dyshime nuk i kanë mohuar e as pohuar edhe zyrtarët e Qendrës Klinike Universitare dhe as të Ministrisë së Shëndetësisë.
Para nëntë muajsh QKUK ka angazhuar një menaxhere për realizimin e projektit “Transformimi Farmaceutik”. Edona Dujaka ka bërë prezantimin e planit të veprimit më datën 27 korrik të vitit të kaluar, i cili është miratuar edhe nga Bordi i SHSKUK-së. Në këtë plan veprimi të cilin e posedon Gazeta Shneta, ishte planifikuar ridezjnimi i strukturës së Barnatores Qendrore, punësim të farmacistëve, renovim të barnatoreve aktuale dhe rregullim të hapësirave të reja, si dhe furnizim me inventar.
Pak ditë më vonë, më datën 2 gusht 2018 ishte mbajtur edhe një mbledhje ndërmjet Dujakës dhe zyrtarëve të Barnatores Qendrore dhe zyrtarëve të lartë të QKUK-së. Gazeta Shneta ka siguruar procesverbalin e këtij takimi në të cilin zyrtarët ishin dakorduar për rregullimin e disa problemeve lidhur me barnatoret, por kishte pasur edhe hamendje duke filluar nga titulli i projektit “Transformimi Farmaceutik”.
Tanimë kanë kaluar rreth nëntë muaj që nga fillimi i këtij projekti por asnjë barnatore nuk është funksionalizuar në ndonjë nga klinikat e QKUK-së. Në dy klinika, në Neonatologji dhe Gjinekologji, ndonëse nuk ekzistojnë ende barnatoret QKUK ka emëruar përgjegjës dy farmacistë. Të njëjtit po paguhen në rolin e shefave të barnatoreve të cilat nuk janë funksionalizuar ende.
Gazeta ka mësuar nga burime se zyrtarët e Barnatores Qendrore janë urdhëruar që të bëjnë kërkesa për inventar të barnatoreve. Kjo ndodh në kohën kur Barnatorja Qendrore përballet me gjendje të rëndë, ku barnat rrezikohen nga uji e myku. Për këtë gjendje kanë raportuar edhe mediat para disa javësh, për çka zyrtarët e QKUK-së iu kishin bërë presion personelit të BQ-së.
Në kuadër të këtij projekti, MSH ka kontraktuar edhe një kompani për të krijuar një modul të ri krahas Sistemit të Informimit Shëndetësor. Ky modul, Sistemi për Menaxhmin e Stokut Farmaceutik, është projektuar nga kompania “Dataprognet”. E njëjta pati dhënë një program si donacion në MSH vitin e kaluar për menaxhimin e kontratave për furnizim me barna. MSH s’ka dhënë sqarime pse është angazhuar kjo kompani dhe sa ka kushtuar SMSF.
Gazeta ka kërkuar sqarime nga QKUK dhe MSH lidhur me këtë projekt para një jave, por të njëjtit nuk kanë kthyer përgjigje duke mos treguar as koston e këtij projekti. /Gazeta Shneta/