Një studim i ri sugjeron se konsumimi i rregullt i kafesë madje edhe i kafesë pa kafeinë mund të ketë ndikim pozitiv në humor, stres dhe shëndetin e trurit. Studiuesit zbuluan se ndryshimet në gjendjen emocionale lidhen ngushtë me mikrobiomën e zorrëve dhe me disa metabolitë të prodhuar gjatë procesit të metabolizmit.
Hulumtimi, i realizuar nga “Qendra APC për Mikrobiomën e Irlandës në Universitetin College Cork”, dhe i publikuar në revistën “Nature Communications”, thekson se kafeja nuk ndikon vetëm në energji, por edhe në boshtin zorrë-tru, një sistem komunikimi i dyanshëm mes sistemit tretës dhe trurit.
Sipas studiuesit John Cryan, kafeja është “më shumë se kafeinë”, pasi ajo ndërvepron me bakteret e zorrëve, metabolizmin dhe gjendjen emocionale. Mikrobioma e zorrëve përbëhet nga triliona mikroorganizma që luajnë rol të rëndësishëm në shëndetin fizik dhe mendor, shkruan burimi Medical News Today transmeton Gazeta Shneta.
Në studim morën pjesë 62 persona, të ndarë në konsumues të rregullt të kafesë dhe jo-konsumues. Konsumuesit zakonisht pinin 3 deri në 5 filxhanë në ditë. Studiuesit analizuan humorin, stresin, funksionin kognitiv, gjumin dhe mostrat e jashtëqitjes dhe urinës për të vlerësuar mikrobiomën dhe metabolitët.
Më pas, pjesëmarrësit ndaluan konsumimin e kafesë për 14 ditë dhe më pas u ndanë në dy grupe: njëri konsumoi kafe me kafeinë, tjetri kafe pa kafeinë për 21 ditë.
Rezultatet treguan se rikthimi i kafesë, qoftë me apo pa kafeinë, lidhej me përmirësim të humorit dhe ulje të stresit, depresionit dhe impulsivitetit. Kafeja me kafeinë u lidh gjithashtu me rritje të përqendrimit, vigjilencës dhe ulje të presionit të gjakut. Ndërsa kafeja pa kafeinë tregoi përfitime në kujtesë, të mësuar, aktivitet fizik dhe cilësinë e gjumit.
Studiuesit vunë re gjithashtu ndryshime të dukshme në mikrobiomën e zorrëve, me rritje të disa baktereve të lidhura me efekte pozitive shëndetësore. Po ashtu, u identifikuan nëntë metabolitë kryesorë të lidhur me konsumin e kafesë, të cilët lidhen me aktivitetin bakterial dhe funksionin kognitiv. /Gazeta Shneta/